Ol i Amamas Tru Long En!
1 Ol famili Kristen long olgeta hap i tenkyu tru long video Young People Ask—How Can I Make Real Friends? Wanpela papa long Amerika i tok taim em i lukim pinis dispela video wantaim ol pikinini man bilong em, ol pikinini i pasim maus na sindaun isi—ol i pilim tru olgeta samting video i kamapim! Wanpela ripot i kam long Malawi i tok ol yangpela brata sista long dispela hap i pilim tru ol samting video i kamapim, long wanem, ol wanskul i save putim wankain hevi long ol. Wanpela papa long Jemani i tok long dispela video: “Mi ting dispela video i soim olsem Jehova i bin harim ol beten bilong mi.” Wanpela yangpela meri i tok: “Tenkyu long kirapim mi long tingim gen olsem Jehova i tingim mi tru.” Wanpela elda long Nu Silan i tok: “Dispela video i helpim wanpela yangpela long bihainim gen rot i go long laip.” Wanpela yangpela meri marit i lukim dispela video na em i tok: “Mi laik tru long olgeta yangpela i stap long tok i tru i mas lukim dispela video na pilim tru tok i tru!” Yupela ol famili, gutpela sapos yupela i lukim gen dispela video, a? Bihain, yupela i ken toktok wantaim long ol dispela askim.
2 Kirap Bilong Video: Wanem kain man i pren tru?—Snd. 18:24.
3 Ol Samting i Pasim Yu Long Kisim Ol Pren: Olsem wanem yu inap daunim pasin bilong tingting olsem ol narapela i no tingim yu? (Fl. 2:4) I gat wanem as na yu mas i gat laik long mekim pasin bilong yu i kamap gutpela moa, na husat inap helpim yu long mekim olsem? Wanem samting bai opim rot long yu inap kisim sampela pren moa, na yu inap painim we ol dispela pren?—2 Ko. 6:13.
4 Stap Pren Bilong God: Olsem wanem yu inap kamapim pasin bilong pas gut wantaim Jehova, na bilong wanem i gutpela long mekim olsem? (Sng. 34:8) Husat inap strongim pasin bilong yu long i stap pren bilong God?
5 Ol Poroman Nogut: Husat ol i poroman nogut? (1 Ko. 15:33) Olsem wanem ol pren nogut inap bagarapim man long ol samting bilong spirit? Stori bilong Daina long Baibel i lainim yu long wanem samting?—Stt. 34:1, 2, 7, 19.
6 Wanpela Pilai: Pasin bilong i stap wanpis i mekim wanem long Tara? Em i tok wanem bilong soim olsem i orait long em i bung wantaim ol yangpela bilong ausait? Wanem ol hevi inap painim em taim em i raun wantaim ol? Bilong wanem papamama bilong em i no luksave long hevi i painim em? Tasol ol i mekim wanem pasin bilong helpim em long kamap strong gen long ol samting bilong spirit? Olsem wanem wanpela painia sista i stap pren tru bilong Tara? Bilong wanem ol Kristen i mas bihainim tok bilong Sindaun 13:20 na Jeremaia 17:9? Tara i bin kisim save long wanem bikpela samting?
7 Bilong Pinisim Tok: Dispela video i bin lainim yu long wanem ol samting? Yu inap mekim wanem wok long en bilong helpim ol narapela?—Sng. 71:17.