Askim

◼ Yumi mas tingim wanem samting taim yumi yusim mobail fon?

Maski yumi stap we, long rot bilong mobail fon yumi inap toktok wantaim ol narapela. Mobail fon i gutpela samting, tasol yumi mas was gut na no ken larim mobail fon i distebim wok autim tok o ol miting Kristen bilong yumi. Olsem wanem dispela inap kamap?

Tingim samting inap kamap sapos mobail fon bilong yumi i ring taim yumi autim tok long man. Man bilong haus bai ting wanem? Em bai kisim wanem tingting sapos yumi ansarim fon? Yumi no laik tru long mekim wanpela samting i pasim ol narapela long harim tok bilong Kingdom. (2 Kor. 6:3) Olsem na sapos yumi karim mobail fon, yumi mas senisim seting bilong en bambai fon i no ken distebim yumi o ol narapela taim yumi autim tok.

Olsem wanem taim yumi wetim ol narapela husat i autim tok? Sapos yumi bin makim taim bilong autim tok, orait yumi mas putim tingting bilong yumi long dispela wok. Bilong soim rispek long wok bilong God, yumi no ken yusim fon long toktok long ol wok samting bilong yumi yet, nogat, yumi mas mekim long narapela taim. (Rom 12:7) Dispela i no makim olsem yumi no ken yusim fon bilong autim tok o makim taim bilong go lukim man.

Yumi mas was gut moa yet long pasin bilong yusim fon taim yumi draiv. Ol ripot i soim olsem dispela inap kamapim eksiden. Yumi mas bihainim ol lo i tambuim pasin bilong yusim fon taim yumi draiv.

Yumi go long ol miting Kristen na ol kibung bilong lotuim Jehova na kisim skul i kam long em. Yumi tingim ol dispela bung i holi, na dispela i mas kirapim yumi long senisim seting bilong fon bambai em i no ken pulim tingting bilong yumi na ol narapela. Sapos wanpela bikpela samting i kamap na yumi mas hariap long mekim samting, orait yumi mas mekim olsem ausait long ples miting. Yumi ken stretim ol wok samting bilong yumi yet long ol narapela taim na i no long taim bilong mekim lotu.—1 Kor. 10:24.

Gutpela sapos pasin bilong yumi long yusim mobail fon i soim olsem yumi tingim ol narapela na yumi tingim moa yet ol samting bilong lotu.