Askim 1
◼ Wanem ol stiatok bilong Baibel i stret long pasin bilong yusim ol mobail fon long taim bilong ol miting Kristen na long taim bilong autim tok?
“Olgeta Samting i Kamap . . . Long Taim Bilong Em Yet.” (Sav. 3:1): Ol mobail fon i opim rot long ol man inap salim teks mesis o toktok wantaim ol narapela long kain kain taim. Tasol i gat sampela taim we ol Kristen i no laik bai mobail fon i distebim ol. Olsem: Ol miting bilong yumi em i taim bilong yumi long lotuim Jehova, kisim ol skultok bilong em, na amamas long strongim narapela narapela. (Lo 31:12; Sng. 22:22; Rom 1:11, 12) Olsem na i gutpela sapos yumi pasim fon taim yumi go kamap long Haus Kingdom, na bihain taim miting i pinis yumi ken sekim ol teks mesis. Sapos i gat wanpela hevi samting na yumi mas larim fon i on, orait putim long vaibret na bai i no ken distebim ol narapela.
“Mekim Olgeta Samting Bilong Helpim Gutnius.” (1 Kor. 9:23): Sampela taim, i gat as na yumi mas yusim mobail fon long taim bilong wok autim tok. Ating brata bilong lukautim grup bai yusim fon bilong sekim ol bratasista i autim tok long narapela hap bilong teritori. Sampela taim ol pablisa i save yusim fon bilong ol long ringim ol gobek o Baibel sumatin paslain long ol i go lukim ol, moa yet sapos dispela man o meri i stap longwe liklik. Sapos yumi karim fon wantaim yumi, yumi mas was gut na no ken larim em i krai na distebim yumi taim yumi autim tok long man bilong haus. (2 Kor. 6:3) Taim yumi wok long wetim ol narapela pablisa, em i gutpela pasin long putim tingting long wok autim tok na long brata o sista yumi poroman wantaim long autim tok, na i no gutpela long ring o salim teks long ol pren.
Tingim Gut Ol Narapela. (1 Kor. 10:24; Fili. 2:4): Yumi no ken kisim dispela tingting olsem, sapos mi go leit long grup bilong autim tok mi ken ring o salim teks mesis long wanpela na painimaut grup i autim tok long wanem hap. Taim yumi kam leit long grup, planti taim brata bilong lukautim grup i mas senisim gen ol poroman bilong autim tok. Tru, sampela taim i gat ol samting i kamap we yumi no inap long abrusim na dispela i mekim na yumi leit. Tasol sapos yumi gat pasin bilong kamap long taim stret, yumi soim olsem yumi tingim rot Jehova putim, brata i lukautim grup, na ol narapela pablisa.