Go Bek Lukim Olgeta Man i Gat Laik Long Harim Tok
1 Planti bilong yumi i insait long tok i tru long nau, long wanem, wanpela Witnes i bin lukim olsem yumi harim gut tok bilong Kingdom na em i kam bek lukim yumi—ating planti taim—bilong kirapim laik bilong yumi long harim sampela tok moa. Yumi tu i mas wok strong long go bek lukim olgeta man i gat laik long harim tok. Wok bilong mekim ol gobek i insait long wok bilong ‘kamapim ol disaipel.’—Mt. 28:19, 20.
2 Luksave Long Laik: Maski man i no kisim buk o nius samting, lukluk bilong pes, krai bilong nek, o ol tok bilong em, inap makim olsem em i gat laik long harim tok bilong Kingdom. Long dispela as yumi ken go bek lukim em. Wanpela brata i bin go bek lukim wanpela man 5-pela taim insait long 5-pela wik na man i no kisim wanpela buk o nius. Long namba 6 taim, man i kisim buk, na bihain brata i kirapim Baibel stadi wantaim em.
3 Sapos yu lukim olsem man i gat laik long harim tok, go bek hariap, olsem 2-pela o 3-pela de bihain. No ken givim rot long “Satan” long rausim ol tok yu i bin planim long bel bilong em. (Mt. 13:19) Sapos yu bin pasim tok long go bek lukim em long wanpela taim stret, orait yu mas truim tok bilong yu.—Mt. 5:37.
4 Autim Tok Long Rot: Taim yu autim tok long rot o long narapela ples na yu bungim man i gat laik long harim tok, yu save go bek lukim em? Taim yu pinis long toktok wantaim man, yu ken tok: “Mi amamas tru long toktok wantaim yu. Olsem wanem mi ken bungim yu gen?” Sampela pablisa, taim ol i ting i orait long mekim olsem, ol i save givim telefon namba bilong ol o askim man long telefon namba bilong em. Taim ol man i lukim olsem oltaim yu save autim tok long rot long wankain hap, ating bai ol i orait long givim telefon namba o atres long yu. Tasol maski sapos ol i no laik givim, yu ken wok yet long kirapim laik bilong ol long harim sampela tok moa long narapela taim yu bungim ol long rot.
5 Taim yumi lukim diwai yumi bin planim na givim wara long en i wok long gro, yumi amamas tru. Na olsem tasol, yumi inap kisim bikpela amamas long rot bilong mekim ol gobek na helpim ol man long kamap strong long ol samting bilong spirit. (1 Ko. 3:6) Putim mak long go bek lukim olgeta man i gat laik long harim tok.