Helpim Ol Narapela Long Litimapim Nem Bilong Jehova
1 Long olgeta hap bilong graun ol manmeri i wok long kisim wanpela bikpela toksave: “Taim i kamap pinis bilong God i skelim pasin bilong olgeta man long kot. Olsem na yupela i mas pret long em na litimapim nem bilong em. Yupela i mas lotu long God, em i bin wokim heven na graun na solwara na olgeta hul wara.” (KTH 14:6, 7) Em wok bilong yumi long autim dispela toksave. Ol man i mas save long wanem samting bilong Jehova na bai ol inap pret long em na lotuim em?
2 Nem Bilong Em: Ol man i mas save long nem bilong em na bai ol i ken save olsem dispela wanpela trupela God tasol em i narapela kain long planti god giaman ol man i lotuim long nau. (Lo 4:35; 1 Ko. 8:5, 6) Ol man bilong raitim Baibel ol i bin yusim dispela nambawan gutpela nem bilong Jehova winim 7,000 taim. Tru, yumi save skelim gut ol samting taim yumi laik kamapim nem bilong God long namba wan taim, tasol yumi no ken pret o surik liklik long yusim dispela nem. God i laik bai olgeta manmeri i mas save long nem bilong em.—Sng. 83:18, NW.
3 Pasin Bilong Em: Bilong litimapim nem bilong Jehova, ol man i mas save long em i wanem kain God. Yumi mas helpim ol long save long ol pasin bilong em, olsem pasin sori, bikpela save, pasin i stret olgeta, bikpela strong, pasin marimari, gutpela pasin sori, na ol narapela gutpela pasin. (Kis. 34:6, 7) Na tu, ol i mas lain long kisim pasin bilong pret long God, na daun long em, na luksave olsem Jehova i mas orait long ol bambai ol inap kisim laip.—Sng. 89:7.
4 Go Klostu Long God: Bilong abrusim bagarap long de bilong God long mekim kot, ol man i mas bilip na askim Jehova long helpim ol. (Ro. 10:13, 14; 2 Te. 1:8) Dispela i makim olsem man i mas kisim save long nem bilong God na ol pasin bilong em, na i gat sampela samting moa em i mas mekim. Yumi mas helpim ol man long pas gut wantaim Jehova na bilip tru long em long bel olgeta bilong ol. (Snd. 3:5, 6) Taim ol i bihainim ol samting ol i kisim save long en, na beten strong long God, na lukim em i helpim ol long i stap bilong ol, bilip bilong ol bai kamap strong na dispela bai helpim ol long i go klostu long Jehova.—Sng. 34:8.
5 Yumi mas givim bel tru long tokaut long nem bilong God na helpim ol narapela long bilip tru long em na pret long em. Ating yumi inap helpim yet planti man moa long kisim save long Jehova na litimapim nem bilong em olsem God bilong “kisim bek” ol.—Sng. 25:5.