Abrusim Ol Samting “i No Inap Helpim” Yu
1 Wanpela bikpela rot bilong salim tok i go i kam long nau em E-meil. Tru i no gat lo i pasim man long yusim E-meil na i stret ol famili na pren i salim ol tok i go i kam, olsem ol ekspiriens samting, tasol i gat wanem ol samting long E-meil em ol “i no inap helpim” yumi?—Snd. 12:11.
2 Ol Samting Yu Mas Lukaut Long En Long E-Meil: Sampela i tok ol i pilim olsem ol i kisim gut ol tok i kam long oganaisesen bilong Jehova taim ol i kisim ol stori long rot bilong E-meil, long tingting bilong ol i olsem ol i kisim ol nupela save. Ating sampela tok ol i kisim i stori long ol ekspiriens, ol samting i kamap long hetkota bilong yumi, ol ripot bilong ol bagarap i kamap o long ol birua i mekim nogut long ol Witnes, na tu, ol tok i bin kamap long Skul Bilong Wok Kingdom na i no bilong olgeta long harim. Sampela ol i save amamas tru long salim ol kain tok olsem, na ol i laik bai ol i namba wan lain long salim dispela tok long ol pren bilong ol.
3 Sampela taim, ol man i save paulim o skruim sampela tok moa long ol stori na ekspiriens. O ating sampela man i laik mekim ol stori i kamap narapela kain, olsem na ol stori ol i kamapim i no stret tumas. Ol man i save hariap long kamapim ol kain stori olsem, ating ol i no save gut long olgeta samting bilong dispela stori. (Snd. 29:20) Sampela taim, maski i hatwok long ting olsem wanpela stori i tru, ol man i save tokim ol narapela tu long en na mekim olsem em samting ol i ken amamas long save long en. Ol kain stori olsem i no stret o i paulim man em ol “rabis na kranki stori” na i no kamapim pasin bilong givim bel long God.—1 Ti. 4:6, 7.
4 Sapos yu salim sampela stori long narapela na ol dispela stori i no stret, yu bai gat asua sapos dispela stori i mekim na man i bel hevi o tingting bilong em i paul. Taim Devit i kisim toksave olsem ol i bin kilim i dai olgeta pikinini man bilong em, bel bilong em i bagarap tru na “em i brukim klos bilong en.” Tasol olgeta pikinini bilong em i no bin i dai, wanpela tasol i bin i dai. Devit i bel hevi long pikinini bilong em i dai, tasol tok giaman em i bin kisim long namba wan taim i bin mekim em i bel hevi moa yet. (2 Sml. 13:30-33) Yumi no laik mekim wanpela samting i paulim ol brata bilong yumi o i mekim ol i bel hevi.
5 Rot God i Bin Makim Bilong Givim Tok: Papa bilong yumi long heven em i bin makim wanpela rot bilong givim tok long yumi, em long rot bilong “wokboi i gat gutpela tingting.” Dispela “wokboi” i gat wok long skelim wanem ol tok em bai givim long ol bilipman, na tu, em i mas skelim “taim stret” bilong kamapim ol tok. Dispela kaikai bilong spirit i save kam long rot bilong oganaisesen tiokratik tasol. Oltaim yumi mas lukluk long rot God i bin makim bilong kisim ol tok bilong helpim yumi, na i no long ol man i yusim Intenet.—Mt. 24:45.
6 Ol Web-Sait Bilong Intenet: Yumi gat wanpela web-sait long Intenet: www.watchtower.org. Dispela web-sait i kamapim ol tok em olgeta man inap lukim. I no gat wok long wanpela man, komiti, o kongrigesen long redim wanpela web-pes i stori long ol Witnes Bilong Jehova. Sampela man i bin kamapim long web-sait ol tok bilong ol buk na nius bilong yumi wantaim ol tok bilong olgeta skripsa na referens. Na tu, ol i bin tokim ol man olsem ol inap kisim ol tok bilong kibung sapos ol i givim kontribiusen. Maski ol i kisim win mani o nogat, pasin bilong wokim kopi bilong ol buk na nius bilong ol Witnes Bilong Jehova na kamapim long Intenet samting, dispela i brukim lo ol i kolim kopi-rait. Ating sampela i ting ol i mekim wok bilong helpim ol brata, tasol oganaisesen i no orait long dispela pasin na ol man i mekim dispela pasin ol i mas lusim olgeta.
7 Taim yumi bihainim pasin bilong skelim gut ol samting na tingting gut taim yumi yusim Intenet samting bilong salim ol tok i go i kam, dispela bai helpim yumi long tingim “olkain samting i dia tumas.”—Snd. 24:4.