Yumi Mas Tingim Gut Ol Man Ol i Olsem Piksa Bilong Givim Tok Lukaut Long Yumi Long Nau
Yumi olgeta i ken strongim laik bilong yumi long holimpas pasin bilong i stap gut long God taim yumi tingim gut ol tok i stap long drama bilong Baibel em ol i wokim olsem video, nem bilong en Warning Examples For Our Day. Paslain long lukim dispela video, plis ritim Namba sapta 25 na ol stori i stap long buk Insight on the Scriptures, Volium 2, pes 419, paragraf 3-5. Orait nau bekim ol dispela askim: Ol lain Moap ol i husat? Na bilong wanem Jehova i tokim Moses long ol i no ken pait long ol? (Lo 2:9) Olsem wanem Balam i mekim wok long ol lain Moap bilong bagarapim ol Israel? Bilong wanem yumi no ken lusim tingting olsem planti Israel i bin pundaun long bikpela traim klostu long taim ol i laik go insait long Graun Bilong Promis?—1 Ko. 10:11, 12.
Taim yumi wok long lukim dispela video, tingim fopela samting long i stap bilong yumi em yumi mas was gut long en long nau, sapos yumi laik i stap gut long God na em i ken orait long yumi. (1) Tingting: Olsem wanem sampela Israel i tingting nogut long Jehova na ol samting em i makim? Yumi mas wok strong long kisim wanem tingting? (2) Ol Poroman: Bilong wanem Jehova i no laik bai ol Israel i poroman wantaim ol Moap? (Kis. 34:12; Snd. 13:20) Bilong wanem yumi mas bihainim gutpela tingting taim yumi makim ol man yumi laik poromanim? (3) Stretpela Pasin: Ol poroman nogut i bin pulim 23,000 Israel long mekim wanem bikpela sin? (1 Ko. 10:8) Long nau, wanem samting i giamanim sampela manmeri bilong God na ol i mekim pasin pamuk? Olsem wanem yumi ken lukautim yumi yet? (4) Lotu: Ol samting i painim ol Israel, olsem wanem em i traim pasin bilong ol long stap klin long lotu? Wanem sampela pasin bilong lotuim god giaman em ol i no stap ples klia na sampela i save mekim long nau? Olsem wanem yumi inap sakim ol dispela pasin?—Kl. 3:5.
Long drama yumi lukim, olsem wanem Jamin i kisim blesing long pasin bilong em long stap gut long God? Long rot bilong dispela video, Gavening Bodi i laik givim wanem gutpela tok long olgeta trupela Kristen? Sapos yu het bilong famili, bilong wanem yu ting em i gutpela sapos famili bilong yu i lukim dispela video planti taim?