Autim Tok Bilong Kingdom
1 “Mi mas autim gutnius bilong kingdom bilong God long ol arapela taun tu. God i salim mi na mi kam bilong mekim dispela wok.” (Lu. 4:43) Ol dispela tok bilong Jisas i kamapim klia bikpela tok em i autim—Kingdom bilong God. Long nau tu, tok yumi autim i stori long Kingdom, olsem Matyu 24:14 i bin tok profet long en: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” Ol man i mas harim wanem ol tok i tru bilong Kingdom bilong God?
2 Kingdom bilong God i kamap pinis long heven na klostu nau em bai senisim olgeta gavman bilong ol man. Ol i rausim pinis Satan long heven, na taim bilong las de bilong pasin nogut bilong dispela graun i kirap. (KTH 12:10, 12) Ol pasin nogut bilong dispela graun Satan i bosim bai bagarap na pinis olgeta, tasol Kingdom bilong God bai i no inap surik liklik. Em bai i stap oltaim oltaim.—Dan. 2:44; Hi. 12:28.
3 Kingdom bai inapim tru ol gutpela laik bilong olgeta man i bihainim tok. Em bai pinisim pen na hevi i kamap long pasin pait, pasin raskol, pasin bilong daunim ol man, na i stap rabis. (Sng. 46:8, 9; 72:12-14) Bai i gat planti kaikai inap tru long olgeta man. (Sng. 72:16; Ais. 25:6) Ol sik na bagarap bilong skin bai kamap ol samting bilong bipo. (Ais. 33:24; 35:5, 6) Ol man bai kamap gutpela olgeta, na dispela graun bai kamap wanpela paradais, na olgeta man bai i stap wanbel wantaim.—Ais. 11:6-9.
4 Pasin yumi bihainim nau long i stap bilong yumi i kamapim olsem yumi laik i stap aninit long Kingdom bilong God. Yumi mas larim tok bilong Kingdom i stiaim olgeta samting long i stap bilong yumi, ol mak yumi laik winim na wanem ol samting i bikpela samting. Olsem: Tru, yumi gat wok long lukautim famili bilong yumi, tasol yumi no ken larim ol samting bilong skin i pasim yumi long mekim ol wok bilong Kingdom. (Mt. 13:22; 1 Ti. 5:8) Yumi mas bihainim tok bilong Jisas: “Yupela i mas wok pastaim long painim kingdom bilong God wantaim stretpela pasin bilong em. Na bihain bai em i givim dispela olgeta arapela samting tu long yupela.”—Mt. 6:33, Nupela Testamen na Ol Sam.
5 I gat taim i stap yet, olsem na em i bikpela samting long ol man i mas harim na bihainim tok bilong Kingdom. Yumi ken helpim ol long mekim olsem long rot bilong “kirapim tingting bilong ol long ol samting bilong kingdom bilong God.”—Ap. 19:8.