Yu Save Helpim Wok Bilong Kamapim Ripot i Stret?
1 Planti stori bilong Baibel i kamapim ol namba stret, na dispela i helpim yumi long save gut long ol samting i bin kamap. Olsem: Gideon i winim pait na daunim kem bilong ol Midian wantaim 300 man tasol. (Het. 7:7) Ensel bilong Jehova i bin kilim i dai 185,000 soldia bilong ol Asiria. (2 Kin. 19:35) Long Pentikos 33 C.E., inap 3,000 ol i kisim baptais, na bihain liklik namba bilong ol bilipman i go bikpela inap 5,000 samting. (Ap. 2:41; 4:4) Ol dispela stori i kamapim klia olsem ol wokboi bilong God long bipo ol i bin wok strong long kamapim stret stori bilong olgeta samting i bin kamap.
2 Long nau, oganaisesen bilong Jehova i tokim yumi long putim ripot long wok autim tok yumi mekim long olgeta mun. Pasin bilong yumi long bihainim dispela tok bai helpim ol brata long mekim gut wok bilong bosim wok autim tok. Ol ripot inap kamapim olsem yumi mas wok strong moa long mekim sampela hap wok bilong autim tok, o ol i mas salim sampela man moa i go autim tok long sampela hap. Long kongrigesen, ripot bilong wok autim tok i save helpim ol elda long luksave long ol pablisa em ol inap mekim bikpela wok moa bilong autim tok, na ol pablisa i mas kisim helpim. Na ol ripot i stori long wok autim tok i go bikpela i save strongim olgeta brata Kristen. Yu save helpim wok bilong kamapim ripot i stret?
3 Wok Yu Yet i Mas Mekim: Olsem wanem? Long pinis bilong mun, yu save hatwok long tingim gen wok autim tok yu bin mekim long dispela mun? Sapos olsem, orait taim yu mekim wok autim tok, raitim ol wok yu bin mekim. Sampela ol i save raitim long kalenda o notbuk samting. Sampela ol i save karim ripot pepa i go wantaim ol long autim tok. Long pinis bilong mun, givim kwik ripot bilong yu long wasman bilong Buk-Stadi bilong yu. O sapos yu laik, yu ken putim ripot bilong yu long bokis bilong putim ol ripot long Haus Kingdom. Sapos yu lusim tingting long givim ripot, no ken wet long wasman bilong Buk-Stadi i kam askim yu long givim ripot, nogat; kwiktaim yu mas givim ripot long em. Taim yu givim bel long raitim ripot long wok yu bin mekim, dispela i kamapim olsem yu daun long pasin Jehova i bin putim, na yu tingim gut ol brata i gat wok long bungim na stretim ol ripot.—Lu. 16:10.
4 Wok Bilong Wasman Bilong Buk-Stadi: Olsem wasman bilong ol sipsip i save tingim gut ol sipsip, wasman bilong Buk-Stadi i save tingim tru wok em grup bilong em i mekim long mun olgeta. (Snd. 27:23) Em i save ol wan wan pablisa i givim bel long autim tok long olgeta mun na ol i amamas long mekim o nogat, na kwiktaim em i laik givim helpim sapos wanpela pablisa i no bin autim tok inap wanpela mun olgeta. Ating em bai mekim gutpela tok bilong strongim pablisa, o tokim em long wanpela pasin em inap bihainim bilong mekim wok, o em inap askim pablisa long autim tok wantaim em. Ol dispela samting inap kirapim pablisa long insait gen long wok autim tok.
5 Long pinis bilong mun, wasman bilong Buk-Stadi i save skelim gut olsem olgeta long grup i mekim wok bilong ol long putim ripot long wok ol i bin mekim na bai kuskus inap salim stretpela ripot bilong kongrigesen i go long brens-ofis paslain long de namba 6 bilong nupela mun. Taim mun i laik pinis, i gutpela long wasman bilong Buk-Stadi i kirapim gen tingting bilong ol pablisa long putim ripot, na em i ken putim sampela ripot pepa long ples bilong mekim Buk-Stadi. Sapos sampela i save lusim tingting long putim ripot, em i ken mekim sampela gutpela tok bilong kirapim tingting bilong ol na strongim ol long putim ripot.
6 Taim yumi putim kwik ripot bilong wok autim tok, dispela bai helpim wok bilong bungim ripot i kamapim stret ol wok yumi bin mekim. Olsem wanem? Bai yu mekim hap wok bilong yu na putim kwik ripot long olgeta mun?