Wanem Bikpela Samting Long i Stap Bilong Yu?
1 Planti lotu ol i wok strong long mekim ol wok bilong helpim ol man, olsem wokim ol skul o haus sik samting. Ol Witnes Bilong Jehova i wok long ‘mekim gutpela pasin long ol manmeri na sapos sampela i sot long ol samting, orait ol i helpim ol,’ tasol nambawan bikpela samting long ol em wok bilong helpim ol man long ol samting bilong spirit.—Hi. 13:16.
2 Pasin Bilong Ol Kristen Bilong Pastaim: Jisas i bin mekim planti gutpela wok long taim em i stap long graun, tasol nambawan wok em i mekim em long autim tok i tru. (Lu. 4:43; Jo. 18:37; Ap. 10:38) Em i tokim ol disaipel bilong em long “i go mekim olgeta lain manmeri i kamap disaipel” na lainim ol. (Mt. 28:19, 20) Na em i tok ol man i bilip long em ol bai mekim dispela wok i go bikpela moa winim wok em i bin kirapim ol man long mekim. (Jo. 14:12) Jisas i putim wok autim tok i go pas long olgeta narapela wok, long wanem, dispela wok i helpim ol man long kisim save long rot bilong God long kisim bek ol man.—Jo. 17:3.
3 Aposel Pol i tingim wok autim tok olsem wanpela wok em i “mas mekim,” na em i no inap sakim dispela wok. (1 Ko. 9:16, 17) Em i redi long lusim ol samting bilong em yet o karim olgeta kain hevi bambai em inap mekim gut wok bilong em long autim tok. (Ap. 20:22-24) Aposel Pita na ol wanwok bilong em ol tu i bin kamapim wankain pasin. Maski ol man i kalabusim ol na paitim ol, “ol i no lusim wok bilong autim gutnius. Nogat. Ol i tokaut klia olsem, Jisas em i dispela man God i bin promis long salim i kam bilong kisim bek ol manmeri bilong en.”—Ap. 5:40-42.
4 Olsem wanem long yumi? Yumi putim wok bilong autim gutnius bilong Kingdom na kamapim ol disaipel i stap nambawan winim ol narapela samting? Yumi stap olsem Jisas na tingim tru ol man em “tingting bilong ol i paul nabaut, na ol i stap nogut tru, olsem ol sipsip i no gat wasman”? (Mt. 9:36) Ol samting i kamap nau long graun na ol tok profet bilong Baibel i kamapim klia olsem ol pasin nogut bilong nau i laik pinis! Taim yumi tingting long olsem wanem wok autim tok em i bikpela samting, dispela bai kirapim yumi long givim bel moa yet long autim tok.
5 Skelim Sindaun Bilong Yu: Sindaun bilong ol man i save senis, olsem na i gutpela long sampela taim yumi skelim sindaun bilong yumi na bai yumi inap save sapos yumi inap mekim sampela senis i helpim yumi long mekim bikpela wok moa bilong autim tok. Wanpela sista i bin mekim wok painia long yia 1950 samting na i go inap long 1970 samting, tasol sik i mekim na em i lusim dispela wok. Tasol bihain, em i kamap orait gen. I no longtaim i go pinis, em i skelim gen sindaun bilong em na em i tingting olsem em inap mekim gen wok painia. Em i bin amamas tru long go long Skul Bilong Wok Painia long taim em i gat 90 krismas! Olsem wanem long yu? Taim bilong yu long ritaia long wok o pinis long skul i klostu nau? Yu ting dispela senis long sindaun bilong yu inap opim rot long yu long mekim wok painia?
6 Taim Jisas i lukim olsem Marta i ‘tingting planti long bikpela wok bilong redim kaikai samting,’ long gutpela pasin em i tokim Marta olsem em bai kisim planti blesing moa sapos em i no wari tumas long planti samting. (Lu. 10:40-42) Olsem wanem? Yu inap lusim sampela samting i pulim taim bilong yu? Em i bikpela samting long tupela marit wantaim i mas mekim wok mani? Sapos tupela i stretim ol samting na wanpela tasol long famili i mekim wok mani, dispela inap lukautim famili? Planti ol i bin stretim sampela samting long sindaun bilong ol na mekim bikpela wok moa bilong autim tok, na dispela i bin helpim ol long ol samting bilong spirit.
7 I gutpela yumi olgeta i bihainim pasin bilong Jisas na ol aposel! Yumi ken bilip tru olsem Jehova bai blesim ol samting yumi mekim bambai yumi inap mekim bikpela wok moa bilong autim gutnius bilong Kingdom.—Lu. 9:57-62.