Wanpela Wok Bilong Givim Nupela Strong
1 Tok bilong Baibel i save givim nupela strong long olgeta man i kisim dispela tok na bihainim long i stap bilong ol. (Sng. 19:7, 8) Em i helpim ol long kamap fri long ol tok giaman na ol pasin i save nogutim man, na i helpim ol long wetim gutpela samting i kamap bihain. Tasol ol man i kisim dispela gutnius, i no ol tasol i kisim helpim long en, nogat. Ol man i tokim ol narapela long ol dispela tok i tru bilong Baibel, ol tu i save kisim nupela strong.—Snd. 11:25.
2 Wok Autim Tok i Givim Nupela Strong: Jisas i tok olgeta man i orait long stap olsem disaipel Kristen, na mekim wok bilong autim tok na kamapim ol disaipel, “ol samting i no ken givim hevi long [ol] na bai [ol] i kisim malolo.” (Mt. 11:29) Em yet i bin kisim save olsem wok autim tok i bin givim nupela strong long em. Dispela wok i olsem kaikai bilong em. (Jo. 4:34) Taim em i salim ol 70 disaipel i go bilong autim tok, ol i kisim amamas taim ol i lukim Jehova i sambai long wok ol i mekim.—Lu. 10:17.
3 Planti Kristen long nau ol tu i kisim nupela strong taim ol i insait long wok autim tok. Wanpela sista i tok: “Wok autim tok i givim nupela strong long mi, long wanem, em i stiaim ol samting mi mekim na laip bilong mi i gat as bilong en. Mi no save tingim tumas ol hevi bilong mi yet na ol hevi bilong wan wan de taim mi autim tok.” Narapela meri i save givim bel long autim tok, em i tok: “Wok autim tok . . . i helpim mi long olgeta de long tingim olsem Jehova i stap tru, na mi stap bel isi na amamas. I no gat narapela samting inap givim kain amamas olsem long mi.” Yumi gat gutpela samting tru bilong i stap olsem ol “wanwok bilong God”!—1 Ko. 3:9.
4 Plang Bilong Krais Em i Isi Long Karim: Tru, Jisas i tokim ol Kristen long “taitim bun tru,” tasol em i no tok long yumi mas mekim bikpela wok moa i winim skel bilong yumi. (Lu. 13:24) Long gutpela pasin, em i singautim yumi long ‘aninit long plang wantaim em.’ (Mt. 11:29, NW, long sta daunbilo) Ol man i karim ol bikpela hevi, ol i ken bilip tru olsem sapos ol i givim bel olgeta long mekim wok, maski em liklik wok tasol, God bai amamas long wok bilong ol.—Mk. 14:6-8; Kl. 3:23.
5 Yumi mekim wok bilong God em i save tingim tru olgeta samting yumi mekim bilong litimapim nem bilong em, na dispela i save givim nupela strong long yumi. (Hi. 6:10) I gutpela yumi wok strong oltaim long mekim wok bilong em inap tru long skel bilong yumi.