Bihainim Gutpela Pasin Bilong Jehova
1 Taim yumi lukim ol gutpela kala i kamap long skai taim san i go daun o yumi amamas long switpela kaikai, dispela i save kirapim yumi long tenkyu long Jehova, em i As bilong olgeta gutpela samting. Gutpela pasin bilong em i kirapim yumi long bihainim pasin bilong em. (Sng. 119:66, 68; Ef. 5:1) Yumi inap mekim gutpela pasin long wanem rot?
2 Long Ol Man i No Bilip: Wanpela rot bilong yumi ken bihainim gutpela pasin bilong Jehova em long tingim gut ol man em ol i no wanbilip. (Ga. 6:10) Taim yumi mekim ol gutpela pasin bilong helpim ol man, dispela inap kirapim ol long kisim gutpela tingting long ol Witnes Bilong Jehova na long tok yumi autim.
3 Olsem: Wanpela yangpela painia brata i wet long lukim dokta long haus sik, na em i sindaun klostu long wanpela lapun meri i sik nogut tru. Taim ol i singautim dispela brata long i go lukim dokta, em i orait long dispela meri i ken kisim ples bilong em na go lukim dokta. Bihain brata i bungim gen dispela meri long maket, na meri i amamas tru long lukim em. Pastaim dispela meri i save les long harim gutnius, tasol em i tok nau em i save olsem ol Witnes Bilong Jehova i save laikim olgeta man. Ol i kirapim Baibel-stadi wantaim em.
4 Long Ol Brata Bilong Yumi: Yumi bihainim gutpela pasin bilong Jehova taim yumi givim yumi yet bilong helpim ol wanbilip bilong yumi. Long taim bilong ol bikpela bagarap, yumi save kirap kwik long helpim ol brata bilong yumi. Yumi kamapim dispela wankain pasin taim yumi kisim ol narapela long ka em ol i mas i gat helpim long kam long ol miting, na yumi go lukim ol man em skin bilong ol i no strong, na yumi tingim gut sampela moa long kongrigesen em yumi no save gut long ol.—2 Ko. 6:11-13; Hi. 13:16.
5 Narapela samting Jehova i mekim bilong soim gutpela pasin, em i save redi long “rausim sin.” (Sng. 86:5) Yumi ken bihainim dispela pasin bilong em na kamapim olsem yumi laikim gutpela pasin long rot bilong lusim rong bilong ol narapela. (Ef. 4:32) Dispela i save mekim na taim yumi bung wantaim ol wanbilip, yumi stap “belgut.”—Sng. 133:1-3.
6 Gutpela pasin bilong Jehova i ken kirapim yumi long litimapim nem bilong em moa yet na stap amamas. Na tu, dispela i ken kirapim yumi long wok strong long bihainim gutpela pasin bilong em long olgeta samting yumi mekim.—Sng. 145:7; Jer. 31:12.