Askim

◼ I stret long putim ripot bilong famili-stadi?

Sapos wanpela papa o mama Kristen i mekim famili-stadi na ol pikinini i no baptais ol tu i insait long stadi, orait papa o mama i ken putim ripot bilong dispela. Ol i mas bihainim dispela pasin bilong putim ripot: Long olgeta wan wan wik ol i mekim stadi, ol i ken raitim dispela olsem wanpela aua na wanpela gobek, na long pinis bilong mun ol i ken raitim olsem wanpela Baibel-stadi. Ol i mas bihainim dispela pasin bilong raitim ripot maski taim bilong stadi i winim wanpela aua, o ol i mekim tupela o tripela taim long wanpela wik, o ol i mekim stadi wantaim wan wan pikinini.—Lukim buk Lo, p. 104.

Sapos olgeta long haus ol i baptais pinis, orait papamama i no gat wok long putim ripot bilong aua na stadi ol i mekim (ol i ken putim ripot sapos wanpela pikinini i stadi yet long namba tu buk bihain long em i baptais pinis). Ol i mas bihainim dispela pasin bilong raitim ripot, long wanem, ripot bilong wok autim tok bilong kongrigesen i bilong soim wanem samting i kamap long wok bilong autim gutnius na skulim tok i tru bilong Baibel long ol man em ol i no dediket na baptais, na kamap wokman bilong Jehova. (Mt. 24:14; 28:19, 20) Tasol dispela i no makim olsem pasin bilong mekim famili-stadi long olgeta taim em i liklik samting, nogat.

Em wok bilong ol papamama Kristen long stadi wantaim ol pikinini bilong ol. Ol papamama i laik kisim helpim long kirapim famili-stadi o mekim famili-stadi bilong ol i kamap gutpela moa, ol i ken askim ol elda long helpim ol. Sapos sampela samting i mekim na i gutpela long narapela pablisa i mekim Baibel-stadi wantaim pikinini i no baptais yet, na em i kam long wanpela famili Kristen i insait long kongrigesen, orait pastaim ol i mas toktok long dispela samting wantaim wasman siaman o wasman autim tok. Sapos wasman siaman o wasman autim tok i orait long dispela, orait pablisa i mekim dispela stadi em i ken putim ripot bilong dispela olsem em i save mekim long ol narapela stadi bilong em.

Wok bilong skulim ol pikinini long pasin bilong Jehova i save kisim bikpela taim na strong, winim ol samting i stap long ripot bilong wok autim tok. (Lo 6:6-9; Snd. 22:6) I stret yumi tok amamas long ol papamama Kristen long bikpela wok ol i mekim bilong ‘stretim gut ol pikinini bilong ol na skulim ol long tok bilong Bikpela.’—Ef. 6:4.