Askim

● Taim yu mekim famili-stadi o yumi stadi wantaim ol pikinini em ol i no baptais yet, tasol papamama i baptais pinis, yumi mas raitim ripot olsem wanem?

Papamama Kristen i baptais pinis ol i mas lusim bikpela hap taim long lainim ol pikinini bilong ol long pasin Jehova i laikim. (Lo 6:​6, 7; Ef 6:⁠4) Sapos papamama i raitim ol aua ol i lusim bilong lainim ol pikinini bilong ol o ol i no raitim, em i no bikpela samting. Tasol bikpela samting em olsem: Ol i mas lainim pikinini bilong ol.

Ripot bilong kongrigesen em bilong helpim yumi long save long wok kongrigesen i mekim bilong autim tok long ol man bilong ausait, na wok yumi mekim bilong lainim ol manmeri i no dediket na kisim baptais. (Mt 24:14; 28:​19, 20) Tasol sapos papamama Kristen i save mekim famili-stadi wantaim pikinini bilong ol long olgeta wik na sampela pikinini i no baptais yet, orait papa o mama i mas raitim wanpela aua tasol na wanpela gobek tasol long ripot bilong em long olgeta wik, na long pinis bilong mun em i mas raitim wanpela Baibel-stadi tasol. Maski papa o mama i save stadi wantaim pikinini bilong ol planti taim long wik na mekim inap planti aua, em i no ken raitim dispela long ripot bilong em. Papamama i sori tru long pikinini bilong ol, olsem na ol i redi long lusim bikpela hap taim bilong ol long lainim pikinini long tok bilong God.​—⁠Snd 22:⁠6.

Olsem wanem sapos i mas i gat wanpela man bilong helpim papamama long putim tok bilong God i go daun long bel bilong pikinini bilong ol? Ating bai papamama i askim wanpela pablisa long helpim ol. Sapos ol i tingting long mekim olsem, gutpela sapos ol i toktok wantaim wasman siaman bilong kongrigesen o wasman bilong wok autim tok. Sapos papamama i nupela long tok i tru o ol i mas i gat man bilong helpim ol, orait gutpela sapos narapela pablisa i ken mekim Baibel-stadi wantaim pikinini bilong ol. Brata o sista i mekim dispela Baibel-stadi, em tasol bai raitim aua na gobek, na Baibel-stadi long ripot bilong em sapos dispela pikinini i no baptais yet.​—⁠Lukim tok “Long Lain Bilong Yu​—⁠Yu Wanpela Tasol i Stap Long Tok i Tru?” long Wok Kingdom bilong Februeri 1980, pes 10.