Kaikai Bilong Spirit Long Taim Stret
1 Bikpela King Jehova i tok: “Bai mi mekim planti kaikai i kamap long ol gaden bilong yupela. . . . Olsem na bai yupela i no sot moa long kaikai.” (Ese. 36:29) Dispela tok profet i stret long lain bilong God long nau. I olsem Jehova i mekim na kaikai bilong helpim man long i stap laip i kamap planti tru long gaden bilong ol manmeri bilong em. Dispela i kamap klia long ol kaikai bilong spirit yumi kisim long taim stret long rot bilong ol kibung distrik bilong yumi.
2 Long kibung i kamap long Columbus, Ohio, long 1931, Jehova i stiaim lain i lotuim em long kisim wanpela nupela nem—Ol Witnes Bilong Jehova. (Ais. 43:10-12) Long 1935, ol i kisim stretpela tingting long dispela bikpela lain manmeri em Kamapim Tok Hait 7:9-17 i stori long en. Long 1942, Brata Knorr i mekim dispela tok “Gutaim Bai Stap o Nogat?” Dispela tok i kirapim tru ol long mekim wok bilong autim tok long olgeta hap, na dispela i mekim na ol i kamapim Wastaua Baibel Skul Bilong Gileat. Tru, sampela kibung i save stap long tingting bilong yumi inap longtaim tru, tasol olgeta wan wan kibung i olsem wanpela tebol i pulap tru long ol gutpela kaikai bilong spirit em ol i tilim long taim stret.—Sng. 23:5; Mt. 24:45.
3 Yu Save Kaikai Gut? Maski i gat planti kaikai i stap, yumi inap stap bun nating sapos yumi no kisim ol dispela kaikai. (Snd. 26:15) Na i wankain tu long ol samting bilong spirit. Long sampela kibung, ol i lukim olsem sampela i save wokabaut nating i go i kam insait long ples kibung o ol i toktok wantaim ol narapela long taim program i stap yet. Tru, wanpela bikpela samting long kibung em long bung wantaim na strongim ol arapela, tasol taim bilong mekim olsem em paslain na bihain long ol program. (Sav. 3:1, 7) Planti ol i no save go bek na sindaun long sia bilong ol—ol i save go na sindaun ausait long haus kibung. Sapos yumi no sindaun insait na putim gut yau, yumi inap lus long harim wanpela bikpela tok. Ol wasman bilong ol dipatmen bilong kibung na ol brata i gat sampela tok long kibung, sampela taim ol i mas toktok wantaim long ol samting bilong kibung taim program i stap yet. Tasol taim ol i no gat wok samting bilong mekim, ol i mas i stap olsem gutpela piksa na putim gut yau long ol tok bilong program. Yumi olgeta i no laik lusim kaikai bilong spirit ol i givim long yumi.—1 Ko. 10:12; Fl. 2:12.
4 Yumi amamas tru long planti tok i tru long ol samting bilong spirit Jehova i givim long yumi, em i narapela kain tru long ol bilip giaman bilong Kristendom i olsem kaikai i drai pinis! (Ais. 65:13, 14) Wanpela rot bilong soim olsem ‘yumi tenkyu,’ em yumi mas tingim kibung i olsem gutpela rot bilong larim Jehova i skulim yumi. (Kl. 3:15) No ken tingim brata i mekim tok—tingim ol tok em i mekim i olsem tok i kam long Nambawan Bikpela Tisa. (Ais. 30:20, 21; 54:13) Putim gut yau. Raitim ol bikpela tok em i mekim. Long pinis bilong ol wan wan de bilong kibung, tingim gen ol bikpela tok bilong dispela de. Bihainim ol tok yu lainim.
5 Olgeta wan wan kibung i kamap long dispela taim paslain long Armagedon, maski ol i kamap long kem bilong ol refiuji, o long kantri i gat bikpela pait long en, o long hap i gat bel isi, ol i soim olsem yumi winim Satan long pait! Yumi bikpela lain brata i stap wanbel, yumi amamas tru long yumi gat rot long bung wantaim long ol kibung distrik. (Ese. 36:38) Yumi bilip tru olsem: Long pasin sori Jehova bai givim gen long yumi ol ‘kaikai long taim bikman i makim.’—Lu. 12:42.
[Askim Bilong Stadi]
1. Olsem wanem tok bilong Esekiel 36:29 i kamap tru long nau?
2. Long rot bilong ol kibung distrik, olsem wanem Jehova i bin tilim ol kaikai bilong spirit long yumi long taim stret?
3. Yumi mas mekim wanem na bai bikpela kaikai bilong spirit long kibung distrik i ken helpim yumi?
4. Olsem wanem yumi ken soim olsem yumi tenkyu long planti kaikai bilong spirit Jehova i givim long yumi?
5. Wanem ol samting i as na yumi ken amamas long ol kibung distrik bilong yumi?
[Blok long pes 5]
Soim Olsem Yumi Tenkyu Long Ol Kaikai Jehova i Givim Yumi
◼ Putim gut yau
◼ Raitim ol bikpela tok
◼ Long pinis bilong ol wan wan de bilong kibung, tingim gen ol bikpela tok
◼ Bihainim ol tok yu lainim