Bihainim Stretpela Pasin Bilong Jehova
1 “God i save laikim tumas stretpela pasin.” (Sng. 37:28) Olsem na maski em i tokaut olsem dispela graun i pulap long pasin i no stret bai bagarap, pastaim em i stretim rot bilong givim tok lukaut long dispela samting. (Mk. 13:10) Dispela i opim rot bilong ol man long tanim bel na God i ken kisim bek ol. (2 Pi. 3:9) Olsem wanem? Yumi save wok strong long bihainim stretpela pasin bilong Jehova? Taim yumi lukim ol man i karim bikpela pen na hevi, dispela i save kirapim yumi long tokim ol long ol samting yumi bilip na wet long en? (Snd. 3:27) Pasin bilong laikim stretpela pasin bai kirapim yumi long givim bel long autim tok.
2 Autim Tok Long Olgeta Kain Man: Taim yumi tokaut long olgeta man, maski ol i husat, long ol samting God i tingting pinis long kamapim, yumi mekim “stretpela pasin.” (Mai. 6:8) Yumi mas sakim pasin bilong yumi sinman long lukim skin tasol na skelim ol man. (Jem. 2:1-4, 9) Jehova “i laik kisim bek olgeta manmeri, bai ol i ken save long as bilong tok tru.” (1 Ti. 2:4) Tok i tru bilong God inap senisim sindaun bilong ol man. (Hi. 4:12) Taim yumi luksave long dispela, em bai kirapim yumi long autim tok long ol man em sampela bilong ol ating pastaim ol i no laik harim tok.
3 Wanpela sista i save wok long wanpela stua, em i save pret long lukluk bilong wanpela kastama i save kam long stua olgeta taim. Maski i olsem, taim rot i op, em i traim long autim tok long dispela man long tok promis bilong God long Paradais. Dispela man i tokim dispela sista olsem em i no bilip long ol stori nating na em i wanpela man bilong kisim drak. Tasol dispela sista i no les. Wanpela taim dispela man i askim sista long tingting bilong em long longpela gras bilong em, long gutpela pasin dispela sista i stori long tok Baibel i mekim long dispela samting. (1 Ko. 11:14) Sista i kirap nogut long de bihain dispela man i sevim mausgras bilong em na em i gat sotpela gras! Em i laik stadi na dispela sista i stretim rot na wanpela brata i stadi wantaim em, na em i kamap strong na dediket na kisim baptais. Olsem dispela man, planti man i lotuim Jehova long nau ol i amamas olsem ol Witnes i bin kam autim tok bilong Kingdom long ol maski ol i gat wanem kain skin.
4 Klostu nau Jehova bai rausim pasin i no stret long dispela graun. (2 Pi. 3:10, 13) Long dispela sotpela taim i stap yet, yumi mas bihainim stretpela pasin bilong Jehova long rot bilong autim tok long olgeta kain man na bai ol inap abrusim dispela bagarap bai painim ol man nogut bilong dispela graun bilong Satan.—1 Jo. 2:17.