Kisim Tingting Olsem Bilong Ol Painia
1 Maski yu inap mekim wok painia o yu no inap insait long dispela wok, olgeta pablisa bilong Kingdom inap kisim tingting olsem bilong ol painia. Ol i laik bihainim dispela tok long autim tok na kamapim ol disaipel. (Mt. 28:19, 20; Ap. 18:5) Ol i tingim ol man na ol i redi long lusim sampela samting bilong ol na bai ol i ken mekim wok autim tok. (Mt. 9:36; Ap. 20:24) Ol wokman bilong Jehova ol i laik mekim ol samting ol inap mekim bambai ol inap helpim ol narapela long kisim save long tok i tru. (1 Ko. 9:19-23) Orait nau yumi ken tingim wanpela man i bin mekim olsem, em Filip, man bilong autim tok.
2 Autim Tok na Skulim Ol Man: Filip i gat bikpela wok insait long kongrigesen long taim bilong ol aposel. (Ap. 6:1-6) Tasol nambawan wok bilong em, em wok bilong autim gutnius. (Ap. 8:40) Long nau tu, ol elda na ol kongrigesen sevan i mekim ol wok bilong ol, na ol i ken bihainim tingting olsem bilong ol painia long rot bilong givim bel long i go pas long wok bilong autim tok. Dispela bai helpim gut kongrigesen!—Ro. 12:11.
3 Bihain long ol i kilim i dai Stiven, ol man i kirap mekim nogut tru long ol disaipel na dispela i bin bagarapim sindaun bilong ol disaipel. Tasol Filip i autim tok yet, na em i bin go pas long autim tok long ol Samaria. (Ap. 8:1, 4-6, 12, 14-17) Yumi ken bihainim pasin bilong em long rot bilong wok yet long autim tok taim ol hevi i painim yumi na taim yumi autim tok long olgeta kain man yumi bungim.—Jo. 4:9.
4 Yumi inap lukim pasin bilong Filip olsem gutpela tisa bilong Tok Bilong God long stori bilong dispela man Itiopia i bin tanim bel. (Ap. 8:26-38) Taim yumi wok long kisim pasin bilong yusim gut Baibel na ‘toktok wantaim ol man long tok i stap long buk bilong God,’ em i narapela rot bilong bihainim tingting olsem bilong ol painia. (Ap. 17:2, 3) Olsem Filip, yumi wok strong long autim tok long olgeta hap i gat man i stap long en na long taim i stret long mekim.
5 Famili na Kongrigesen: Pasin na tingting bilong Filip i bin helpim ol pikinini meri bilong em. (Ap. 21:9) Olsem tasol, ol papamama Kristen em ol i putim ol samting bilong spirit i stap olsem namba wan samting long i stap bilong ol, dispela i save kirapim ol pikinini bilong ol long mekim olsem tu. Maski long pinis bilong wik skin bilong papa o mama i les, tasol sapos em i givim bel long autim tok dispela bai strongim ol pikinini na ol bai tingim tru dispela long bel inap olgeta taim bihain.—Snd. 22:6.
6 Filip i singautim Pol na Luk long i go long haus bilong em, em tupela Kristen i save givim bel long mekim wok bilong Jehova. (Ap. 21:8, 10) Olsem wanem yumi ken soim olsem yumi pilim tru na yumi laik helpim ol man i givim bel long mekim wok bilong Jehova long nau? Yumi ken wok wantaim ol long moning o apinun bilong wanpela de we i no gat planti i save kam bilong autim tok. (Fl. 2:4) Yumi ken singautim ol i kam long haus bilong yumi bilong toktok wantaim na narapela i strongim narapela. Maski yumi gat wanem kain sindaun, yumi olgeta i mas wok strong long bihainim tingting olsem bilong ol painia.
[Askim Bilong Stadi]
1. Bai yu stori olsem wanem long pasin bilong kisim tingting olsem bilong ol painia?
2. Olsem wanem ol elda na ol kongrigesen sevan i ken bihainim pasin bilong Filip long givim bel long autim tok?
3. Olsem wanem yumi ken bihainim tingting olsem bilong ol painia taim ol hevi i painim yumi?
4. Olsem wanem Filip i stap gutpela piksa olsem tisa?
5. Wanem samting inap helpim ol papamama Kristen long kirapim ol pikinini bilong ol long bihainim tingting olsem bilong ol painia?
6. Olsem wanem yumi ken soim olsem yumi tingim ol painia long kongrigesen bilong yumi?