Filip—Man Bilong Givim Bel Long Autim Gutnius
BAIBEL i gat planti stori bilong ol man na meri em bilip bilong ol yumi inap long bihainim. Tingim Filip, em wanpela misineri Kristen long taim bilong ol aposel. Em i no wanpela aposel, tasol Jehova i mekim ol bikpela wok long em bilong autim tok bilong Kingdom. Filip i kisim nem olsem ‘man bilong autim gutnius.’ (Aposel 21:8) Bilong wanem Filip i kisim dispela nem? Na pasin bilong em inap lainim yumi long wanem samting?
Baibel i stori long Filip bihain liklik long Pentikos 33 C.E. Long dispela taim ol Juda i save tok Grik ol i toktok planti long ol Juda i save tok Hibru na ol i tok, taim ol i tilim kaikai long olgeta de, ol i no save givim kaikai long ol meri long lain bilong ol yet, em ol man bilong ol i dai pinis. Bilong stretim dispela hevi, ol aposel i makim “7-pela man.” Filip, em wanpela bilong ol dispela man ol i makim.—Aposel 6:1-6.
Dispela 7-pela man “i gat gutpela nem.” Baibel bilong James Moffatt i tanim olsem, ol “i gat gutnem.” Tru tumas, long taim ol aposel i makim ol, ol i save pinis olsem ol i man bilong tingim ol samting bilong spirit na ol i man bilong bihainim gutpela tingting. I wankain long ol brata i mekim wok olsem wasman Kristen long nau. Ol i no save makim hariap wanpela man i kamap wasman. (1 Timoti 5:22) Ol i mas “i gat gutpela nem namel long ol man i stap ausait long sios,” na ol wanwok Kristen i mas save olsem ol i man bilong isi long olgeta man na ol i man bilong bihainim gutpela tingting.—1 Timoti 3:2, 3, 7; Filipai 4:5.
Filip i lukautim gut wok bilong em long Jerusalem. Tasol i no longtaim na ol man i kirap mekim nogut tru long ol disaipel bilong Krais na ol i ranawe i go nabaut. Filip tu i lusim taun, tasol wok autim tok bilong em i no pinis. Liklik taim bihain em i wok strong long autim tok long nupela teritori—em Samaria.—Aposel 8:1-5.
Autim Tok Long Nupela Teritori
Jisas i bin tok, ol disaipel bilong em bai autim tok “long Jerusalem, na long olgeta hap bilong Judia, na long distrik Samaria, na i go inap long olgeta hap bilong graun.” (Aposel 1:8) Taim Filip i autim tok long Samaria, em i insait long wok bilong truim dispela tok. Ol Juda i save tingim ol Samaria ol i samting nating. Tasol Filip i no skelim hariap pasin bilong ol dispela man, na em i kisim gutpela blesing long dispela pasin bilong em. Tru tumas, planti Samaria i kisim baptais, wanpela bilong ol em Saimon, bipo em man bilong wokim posin.—Aposel 8:6-13.
Bihain, ensel bilong Jehova i stiaim Filip i go long rot i no gat man, em rot i lusim Jerusalem na i go long Gasa. Long rot Filip i lukim wanpela karis i karim wanpela bikman bilong Itiopia, em i wok long kaunim strong tok profet bilong Aisaia. Filip i ran klostu long karis bilong dispela man na kirap long toktok wantaim em. Maski dispela man Itiopia i bihainim lotu bilong ol Juda na em i gat sampela save long God na long Baibel, long pasin daun em i tokaut olsem, i mas i gat man bilong helpim em long save gut long tok em i kaunim. Olsem na em i singautim Filip long go antap long karis na sindaun wantaim em. Filip i autim tok pinis long em, na bihain ol i kamap long wanpela wara. Dispela man Itiopia i askim olsem: “Ating wanpela samting i pasim rot na mi no inap kisim baptais?” Filip i baptaisim em, na man Itiopia i amamas na bihainim rot bilong em na i go. Ating dispela nupela disaipel i autim gutnius long as ples bilong em.—Aposel 8:26-39.
Wok Filip i mekim long autim tok long ol Samaria na long bikman bilong Itiopia i lainim yumi long wanem samting? Yumi no ken ting olsem ol man bilong wanpela lain, skin, o ol man i gat namba, ol i no inap harim gutnius, nogat. Yumi mas autim tok bilong Kingdom long “olgeta kain man.” (1 Korin 9:19-23) Sapos yumi redi long autim tok long olgeta man, Jehova i ken mekim wok long yumi bilong “mekim ol manmeri bilong olgeta lain i kamap disaipel” paslain long pinis bilong dispela pasin nogut bilong nau i kamap.—Matyu 28:19, 20, NW.
Filip i Mekim Sampela Wok Moa
Bihain long Filip i autim tok long bikman bilong Itiopia, em i autim tok long taun Asdot, “na em i go long olgeta taun nabaut na em i autim gutnius . . . i go kamap long taun Sisaria.” (Aposel 8:40) Long taim bilong ol aposel, dispela tupela taun i gat planti man bilong ol narapela lain i stap long en. Taim Filip i go long hap not bilong Sisaria, ating em i autim tok long ol biktaun bilong ol Juda, olsem Lida na Jopa. Ating long dispela as na bihain ol i painim sampela disaipel long ol dispela hap.—Aposel 9:32-43.
Laspela stori bilong Filip i kamap 20 yia samting bihain. Long pinis bilong namba 3 raun bilong Pol long wok misineri, Pol i lusim sip long Tolemes. Luk, em poroman bilong Pol bilong raun, em i tok: “Long de bihain mipela i lusim Tolemes na mipela i go kamap long taun Sisaria. Na mipela i go long haus bilong Filip, em wanpela man i save autim gutnius long ol manmeri.” Long dispela taim Filip i gat ‘4-pela pikinini meri ol i no marit na ol i save autim tok bilong God olsem profet.’—Aposel 21:8, 9.
Filip i sindaun long Sisaria. Tasol tingting bilong em long wok misineri i stap yet, long wanem, Luk i kolim em “man i save autim gutnius.” Planti taim dispela tok i makim man i lusim as ples bilong em bilong i go autim gutnius long narapela hap i no gat man i bin autim tok yet long en. Fopela pikinini meri bilong Filip ol i autim tok olsem profet i kamapim klia olsem, ol i bihainim pasin bilong papa bilong ol long givim bel tru long autim tok.
Ol papamama Kristen long nau i mas tingim olsem ol pikinini bilong ol, ol i nambawan disaipel bilong ol. Maski sapos papamama i mas lusim sampela wok bilong God ol i mekim, long wanem, ol i gat ol wok bilong famili, olsem Filip ol i ken wok yet long i stap gutpela wokman bilong God na mekim gutpela wok papamama.—Efesus 6:4.
Raun bilong Pol na ol poroman bilong em i givim rot long famili bilong Filip i ken singautim ol i kam long haus na lukautim ol. Yumi ken ting olsem narapela i mekim gutpela tok i strongim narapela! Ating long dispela taim Luk i kisim save long ol wok bilong Filip na bihain em i raitim ol dispela samting long Aposel sapta 6 na 8.
Jehova i mekim bikpela wok long Filip bilong helpim wok bilong autim tok bilong Kingdom. Pasin bilong Filip long givim bel long wok i strongim em long autim gutnius long ol nupela teritori, na long helpim famili bilong em long stap gut long ol samting bilong spirit. Olsem wanem? Yu laik mekim kain gutpela wok olsem na kisim ol gutpela blesing? Sapos olsem, i gutpela sapos yu bihainim pasin bilong Filip, em dispela man bilong autim gutnius.