Yumi Mas Rispektim Wok Bos Bilong Jehova
Taim yu harim ol dispela nem bilong bipo, Kora, Datan, na Abiram, yu save tingim wanem kain pasin? Pasin bikhet! Ol i bikhet long husat? Ol man em God i makim. Stori bilong samting nogut i bin painim ol i stap long Buk Namba sapta 16, na stori bilong dispela samting i stap long Wastaua bilong Ogas 1, 2002, aninit long het tok “Stap Gut Aninit Long Wok Bos Bilong God.” Gutpela sapos yu ritim dispela Wastaua na bihain lukim vidio Respect Jehovah’s Authority. Yu bai lukim ol pikinini man bilong Kora ol i stap gut long God tasol papa bilong ol em i bikhet, em i no wanbel wantaim King bilong heven na graun. (Nam. 26:9-11) Dispela drama bilong samting i bin kamap tru i mas kirapim yumi olgeta long i stap gut moa yet long Jehova.
Taim yu lukim dispela vidio, yu mas painim sikspela samting em Kora na bikhet lain bilong em i bin mekim na ol i no stap gut long Jehova: (1) Olsem wanem ol i no daun long ol man God i makim? (2) Olsem wanem ol i larim pasin antap, na pasin bilong tingting strong long kisim namba, na pasin bilong jeles i stiaim ol? (3) Olsem wanem ol i tingim tingim popaia bilong ol man Jehova i makim? (4) Ol i toktok planti long wanem samting? (5) Bilong wanem ol i no amamas moa long ol gutpela wok ol i holim pinis? (6) Olsem wanem ol i putim ol pren na famili i stap namba wan na pasin bilong i stap gut long Jehova i stap namba tu?
Skelim ol samting dispela drama bilong Baibel i lainim yumi na olsem wanem yumi ken i stap gut long ol man God i makim: (1) Yumi mas i gat wanem tingting long ol tok ol elda bilong kongrigesen i pasim? Bilong wanem yumi mas mekim olsem? (2) Olsem wanem yumi ken daunim ol tingting i no stret i stap long bel bilong yumi? (3) Yumi mas i gat wanem tingting long ol popaia bilong ol man God i makim long i go pas long yumi? (4) Yumi mas mekim wanem sapos pasin bilong toktok planti i wok long kamap strong long bel bilong yumi? (5) Yumi mas i gat wanem tingting long ol wok yumi holim pinis? (6) Nambawan man yumi mas i stap gut long en em God, olsem na yumi no ken larim husat i kisim ples bilong em? Wanem taim dispela samting inap kamap olsem bikpela traim tru long yumi?
Gutpela sapos yu lukim gen dispela vidio bihain long yupela i stori pinis long en long kongrigesen. Bikpela samting moa em yu mas pilim tru as na oltaim yumi mas rispektim wok bos bilong Jehova!—Sng. 18:25; 37:28.