Holimpas Tingting Olsem Taim i Sot Pinis!
1 Jisas i save olsem taim bilong em long mekim wok bilong Papa bilong em long graun em i sot pinis. (Jo. 9:4) Olsem na em i mekim wok bilong em wantaim tingting olsem taim i sot pinis, na em i lainim ol disaipel bilong em long mekim olsem tu. (Lu. 4:42-44; 8:1; 10:2-4) Ol samting bilong givim gutpela sindaun long em i stap nambatu. (Mt. 8:20) Long dispela rot em inap long pinisim ol wok Jehova i bin givim em long mekim.—Jo. 17:4.
2 Taim i Sot: Taim bilong autim gutnius long “olgeta hap bilong graun” tu i sot. (Mt. 24:14) Tok profet bilong Baibel i soim olsem yumi stap klostu long pinis bilong las de. I no longtaim na ‘ol man i no laik save long God na ol man i no bihainim gutnius bilong Jisas, Bikpela bilong yumi, bai ol i kisim pe nogut long bagarap i stap oltaim oltaim.’ (2 Te. 1:6-9) Dispela de bilong kot bai kamap wantu tasol. (Lu. 21:34, 35; 1 Te. 5:2, 3) Ol manmeri i mas luksave olsem ol i stap long taim bilong pinis. Em wok bilong yumi long helpim ol long mekim ol samting na bai Jehova i ken orait long ol, taim i gat haptaim i stap yet.—Sef. 2:2, 3.
3 Mekim Ol Samting Yumi Inap Long Mekim: Ol wokman bilong Jehova i luksave olsem “taim i sotpela nau,” so ol i putim wok autim tok i stap nambawan. (1 Ko. 7:29-31; Mt. 6:33) Sampela i bin lusim sampela bikpela wok mani o sampela narapela samting bilong ol yet na bai ol inap mekim moa yet wok autim tok. (Mk. 10:29, 30) Sampela narapela i mekim yet “planti wok bilong Bikpela” maski hevi i painim ol. (1 Ko. 15:58) Planti i bin autim dispela gutnius inap planti planti yia, tasol ol i no surik. (Hi. 10:23) Jehova i tingim tru olgeta dispela hatwok bilong helpim wok bilong Kingdom.—Hi. 6:10.
4 Taim yumi givim bel long lotuim Jehova, na mekim wok autim tok, dispela i helpim yumi long tingim de bilong Jehova i klostu. Dispela i lukautim yumi long ol samting nogut bilong dispela graun bilong Satan na i strongim yumi long holimpas pasin bilong i stap holi. (2 Pi. 3:11-14) Tru tumas, taim yumi mekim wok autim tok wantaim tingting olsem taim i sot pinis, dispela inap helpim yumi na ol man i harim tok bilong yumi long abrusim bagarap.—1 Ti. 4:16.