Namba 3 Hap—Mekim Ol Baibel Stadi i Save Helpim Ol Man
Mekim Gutpela Wok Long Baibel
1 As na yumi mekim ol Baibel stadi i olsem: Yumi laik helpim ol man long kliagut na bilip long ol tok bilong Baibel na bihainim long i stap bilong ol na bai ol i ken “kamap disaipel.” (Mt. 28:19, 20; 1 Te. 2:13) Olsem na Baibel i mas i stap olsem bikpela samting long stadi. Pastaim i gutpela sapos yu soim sumatin long olsem wanem em i ken painim ol skripsa insait long Baibel bilong em yet. Tasol olsem wanem yumi ken mekim wok long Baibel bilong helpim ol man long kamap strong long ol samting bilong spirit?
2 Makim Ol Skripsa Bilong Ritim: Taim yu redim stadi, skelim olsem wanem olgeta wan wan skripsa long stadi i stret wantaim tok bilong stadi, na makim sampela skripsa yupela bai lukim na stori long en long taim bilong stadi. I gutpela long ritim ol skripsa i stori long as bilong ol bilip bilong yumi. I no gat wok long ritim ol skripsa i no stori tumas long ol tok bilong stadi. Tingim sindaun bilong sumatin na ol samting yu mas helpim em long en.
3 Mekim Ol Askim: I no gutpela long yu stori long ol skripsa bilong Baibel long ol sumatin, larim sumatin i kamapim insait bilong ol skripsa. Yu ken mekim olsem long rot bilong kamapim gut ol askim. Sapos tok bilong skripsa i klia na i no hatwok long kisim insait bilong en, orait yu ken askim sumatin long stori long olsem wanem tok bilong dispela skripsa i helpim tok bilong paragraf. Sampela taim, yu mas kamapim wanpela o sampela askim bilong stiaim sumatin long kisimgut tok. Sapos yu mas kamapim sampela tok moa, orait yu ken mekim olsem bihain long sumatin i kamapim pinis bekim bilong em.
4 No Ken Kamapim Planti Toktok: Man i gat save long sut long spia em i yusim wanpela spia tasol na spia i save kamap stret long mak. Olsem tasol, gutpela tisa i no save mekim planti toktok bilong kamapim klia wanpela tok. Em inap kamapim ol tok i no hatwok long kisim, tok i klia, na i stret. Sampela taim, yu mas mekim wok painimaut long ol buk na nius Kristen bambai yu ken kliagut long wanpela skripsa na yu inap kamapim gut insait bilong en. (2 Ti. 2:15) Tasol yu mas abrusim pasin bilong kamapim mining bilong olgeta wan wan skripsa bilong stadi. Stori tasol long ol tok i stret bilong kamapim klia tok bilong stadi.
5 Helpim Sumatin Long Bihainim Ol Tok Em i Lainim: Sapos i stret long mekim, helpim sumatin long kisim save long olsem wanem ol tok bilong Baibel i stret long em. Olsem, taim yu stori long Hibru 10:24, 25 wantaim wanpela sumatin husat i no kam yet long ol miting Kristen, yu ken stori long wanpela bilong ol miting na singautim em long kam. Tasol no ken subim em long mekim olsem. Larim Tok Bilong God i kirapim em long mekim samting i amamasim Jehova.—Hi. 4:12.
6 Taim yumi mekim wok bilong yumi long kamapim ol disaipel, yumi mas kirapim ol man long “bilip long [God] na mekim ol pasin em i laikim” long rot bilong mekim gutpela wok long Baibel.—Ro. 16:26.
[Askim Bilong Stadi]
1. Bilong wanem yumi mas kamapim gut ol tok bilong Baibel taim yumi stadi wantaim ol man?
2. Olsem wanem yumi inap skelim wanem ol skripsa bilong Baibel bai yumi ritim na stori long en?
3. Olsem wanem pasin bilong mekim wok long ol askim i gutpela? Olsem wanem yumi inap mekim olsem?
4. Yumi ken kamapim hamas tok bilong ol skripsa yumi ritim?
5, 6. Olsem wanem yumi inap helpim ol sumatin long bihainim ol tok bilong Baibel long i stap bilong ol? Yumi mas abrusim wanem kain pasin?