Mipela Laikim Helpim Bilong Yu
1 “Tenkyu long olgeta samting yu mekim bilong helpim mipela. Wok bilong yu i bin helpim mipela.” Dispela tok i kamapim klia tenkyu bilong yumi long ol elda na kongrigesen sevan bilong yumi. Oganaisesen bilong God i wok long i go bikpela, olsem na i mas i gat ol brata i strong long ol samting bilong spirit long mekim wok elda long klostu 100,000 kongrigesen long olgeta hap. Sapos yu wanpela brata i baptais pinis, mipela laikim helpim bilong yu.
2 “Laikim Gutpela Wok”: Yu ken mekim wanem bilong kisim laik long mekim gutpela wok insait long kongrigesen? (1 Ti. 3:1) Yu mas i stap gutpela piksa long olgeta samting yu mekim. (1 Ti. 4:12; Ta. 2:6-8; 1 Pi. 5:3) Yu mas insait tru long wok autim tok, na helpim ol narapela long mekim olsem tu. (2 Ti. 4:5) Tingim tru ol wanbilip bilong yu. (Ro. 12:13) Stadi gut long Baibel na kisim pasin bilong “skulim” gut ol man. (Ta. 1:9; 1 Ti. 4:13) Mekim gut ol wok em ol elda i givim yu. (1 Ti. 3:10) Sapos yu wanpela papa, ‘yu mas bosim gut meri pikinini bilong yu.’—1 Ti. 3:4, 5, 12.
3 Bilong mekim wok olsem elda o kongrigesen sevan yu mas wok strong na daunim laik bilong yu yet. (1 Ti. 5:17) Olsem na bilong kisim dispela laik long mekim sampela wok moa, tingting long daunim yu yet na helpim ol narapela. (Mt. 20:25-28; Jo. 13:3-5, 12-17) Tingim tingim long bel tingting bilong Timoti, na wok strong long bihainim. (Fl. 2:20-22) Olsem Timoti, larim gutpela pasin bilong yu i opim rot bilong yu long mekim sampela wok moa. (Ap. 16:1, 2) Taim yu wok long kisim ol pasin bilong spirit em yu mas kisim bilong mekim sampela wok moa na yu bihainim ol tok em sampela i givim bilong helpim yu, bai “olgeta manmeri i lukim pasin bilong yu yet i kamap gutpela tru.”—1 Ti. 4:15.
4 Ol Papamama, Lainim Ol Pikinini Long Helpim Ol Narapela: Ol pikinini i ken kirap lain long helpim ol narapela taim ol i liklik yet. Lainim ol long putim gut yau long taim bilong miting, long autim tok, na i stap gutpela piksa long Haus Kingdom na long skul. Skulim ol long helpim ol narapela, mekim ol samting olsem klinim Haus Kingdom, helpim ol lapun, na olkain wok olsem. Larim ol i pilim amamas bilong givim samting long narapela. (Ap. 20:35) Kain skul olsem inap helpim ol long kamap painia, kongrigesen sevan na elda long bihain.