Ol Yangpela Brata, Yupela i Putim Sampela Mak Bilong Winim?
1. Wanem taim yangpela brata i ken kirap long bihainim tok bilong 1 Timoti 3:1?
1 “Sapos wanpela man i [putim sampela mak bilong winim] . . . , em i laik kisim gutpela wok.” (1 Tim. 3:1) Dispela tok i kirapim ol brata long putim sampela mak bilong winim insait long kongrigesen. Yu ting yu mas kamap bikpela man pastaim na bai yu ken mekim olsem? Gutpela taim bilong kirap putim sampela mak bilong winim, em long taim yu stap yangpela mangi yet. Long dispela rot yu inap kisim trening na kamapim ol pasin i soim olsem yu fit long kamap kongrigesen sevan taim yu kamap yangpela man. (1 Tim. 3:10) Sapos yu wanpela yangpela brata i baptais pinis, olsem wanem bai yu inap winim sampela mak?
2. Olsem wanem yu inap kisim pasin bilong daunim sampela laik bilong yu yet? Bai yu mekim wanem bilong kamapim klia dispela pasin?
2 Daunim Sampela Laik Bilong Yu: Tingim olsem yu laik kisim wanpela gutpela wok, i no wanpela biknem. Olsem na wok long kisim laik bilong helpim ol bratasista bilong yu. Wanpela rot bilong mekim olsem, em long tingim tingim long bel ol gutpela pasin bilong Jisas. (Mat. 20:28; Jon 4:6, 7; 13:4, 5) Beten askim Jehova long helpim yu long kisim save gut long ol narapela. (1 Kor. 10:24) Yu ting yu inap helpim ol bratasista long kongrigesen em ol i lapun o ol i gat sik? Olsem wanem? Yu redi long katim gras, klinim, o mekim ol narapela wok bilong stretim ol samting bilong Haus Kingdom? Yu inap volantia long mekim wanpela tok long Skul Tiokratik Bilong Autim Tok? Taim yu daunim sampela laik bilong yu yet bilong helpim ol narapela, dispela bai givim amamas long yu.—Apo. 20:35.
3. Pasin bilong tingim ol wok bilong God i bikpela samting olsem wanem? Olsem wanem yu inap kisim dispela pasin?
3 Tingim Ol Wok Bilong God: Em i bikpela samting long wokman bilong kongrigesen i mas tingim ol wok bilong God i winim save o pasin bilong em yet long mekim ol wok. Man i tingim ol samting bilong God em i save kisim tingting bilong Jehova na Jisas long ol samting. (1 Kor. 2:15, 16) Em i save mekim “ol pasin holi spirit i kamapim.” (Gal. 5:22, 23) Em i save givim bel tru long autim tok na putim ol samting bilong Kingdom i stap namba 1. (Mat. 6:33) Yu inap kisim ol pasin bilong holi spirit taim yu bihainim gutpela sediul bilong mekim stadi bilong yu yet. Olsem: Ritim Baibel long olgeta de, ritim ol wan wan Wastaua na Kirap!, redi gut na go long olgeta miting bilong kongrigesen. (Sng. 1:1, 2; Hib. 10:24, 25) Taim Pol i strongim yangpela Timoti long wok yet long mekim gut wok bilong God, em i tok: “Yu mas was gut long . . . wok yu mekim bilong skulim ol manmeri.” (1 Tim. 4:15, 16) So wok strong long redim ol tok bilong yu long Skul Tiokratik Bilong Autim Tok. Redi gut na insait long wok autim tok long olgeta taim. Putim ol mak olsem, wok painia, wok long Betel, na go long Baibel Skul Bilong Ol Singel Brata na wok strong long winim. Pasin bilong mekim ol wok bilong God bai helpim yu long “ranawe long ol laik i save kamap long bel bilong ol yangpela.”—2 Tim. 2:22.
4. Pasin bilong redi long kisim na mekim gut wok i bikpela samting olsem wanem?
4 Redi Long Kisim na Mekim Gut Wok: Ol brata em ol i kisim wok bilong tilim kaikai long ol Kristen i sot long ol samting long taim bilong ol aposel, ol “i gat gutnem na ol inap tru long mekim wok,” olsem na ol aposel i no inap tingting planti olsem ol dispela brata bai mekim gut wok o nogat? Long dispela rot, ol aposel inap tingting tasol long ol narapela bikpela samting. (Apo. 6:1-4) Olsem na taim yu kisim wanpela wok long kongrigesen, mekim gut inap tru long skel bilong yu. Bihainim pasin bilong Noa, em i bihainim gut olgeta tok God i bin givim long em long wokim sip. (Stt. 6:22) Pasin bilong mekim gut wok i bikpela samting long Jehova na i kamapim olsem man i strong long ol samting bilong lotu.—1 Kor. 4:2; lukim blok “Gutpela Samting i Kamap Long Trening.”
5. Wai na ol yangpela brata i mas putim sampela mak bilong winim?
5 Olsem tok profet i kamapim, Jehova i hariapim wok bilong bungim ol manmeri. (Ais. 60:22) Olsem: Long olgeta wan wan yia, inap olsem 250 tausen manmeri i save kisim baptais. Planti nupela man i wok long kam insait long tok i tru, olsem na i mas i gat ol brata i winim ol mak bilong lukautim ol wok bilong kongrigesen. Long nau, i gat planti wok bilong Jehova long mekim, winim olgeta taim bipo. (1 Kor. 15:58) Olsem wanem long yupela ol yangpela brata, yupela i putim sampela mak bilong winim? Sapos olsem, yupela i laikim gutpela wok tru!
[Rait long pes 2]
Planti nupela man i wok long kam insait long tok i tru, olsem na i mas i gat ol brata i winim ol mak bilong lukautim ol wok bilong kongrigesen
[Blok long pes 3]
Gutpela Samting i Kamap Long Trening
Taim ol elda i givim wok na trenim ol yangpela brata i winim ol mak bilong kisim sampela wok, dispela i save helpim ol. Wanpela wasman sekit i sindaun long pletfom na i strongim 1-pela pablisa bihain long miting. Em i lukim wanpela yangpela brata i sanap klostu na em i askim sapos yangpela brata i laik toktok long em. Yangpela boi i tok, ol elda i givim wok long em long brumim pletfom bihain long olgeta miting. Papamama bilong em i redi long go, tasol em i no laik go inap long em i mekim wok bilong em pastaim. Wasman sekit i pilim tru dispela pasin. Em i tok: “Ol elda long dispela kongrigesen i redi long givim trening long ol yangpela brata i winim ol mak taim ol i givim sampela wok long ol bilong mekim. Olsem na taim mi visitim kongrigesen bilong ol, ol elda inap tok orait long makim wanpela yangpela brata long kamap kongrigesen sevan.”