Mekim Bikpela Wok Moa Long Autim Tok
1 Aposel Pol i tokim ol Kristen long wokabaut long pasin bilong God na “mekim ol dispela pasin moa moa yet.” (1 Te. 4:1) Dispela i makim wanem samting? Wanpela samting em yumi mas wok yet long painim ol rot bilong mekim sampela wok moa bilong God, na oltaim wok strong long “mekim tru dispela wok.”—2 Ti. 4:5.
2 Astingting: Laik bilong yumi long mekim gut wok bilong Man Bilong Wokim yumi, dispela i save kirapim yumi long mekim sampela wok moa. Yumi laik kamap strong long ol samting bilong lotu na painim ol rot bilong mekim gut wok bilong yumi long autim tok. Gutpela sediul na stretpela astingting bilong mekim wok, dispela bai helpim yumi long winim ol mak bilong mekim wok bilong God.—Sng. 1:1, 2; Fl. 4:6; Hi. 10:24, 25.
3 Bilong insait long sampela wok moa bilong autim tok, yumi mas kisim pasin bilong daunim sampela laik bilong yumi yet. Yumi ken kisim kain pasin olsem taim yumi beten na tingim tingim long bel gutpela pasin bilong Jisas. (Mt. 20:28) Jisas i bin kisim bikpela amamas long helpim ol narapela long wok autim tok bilong em. (Ap. 20:35) Yumi inap bihainim pasin bilong Jisas taim yumi tingim ol man na mekim bikpela wok moa long wok autim tok.—Ais. 6:8.
4 Wok Bilong Papamama: Taim ol pikinini i liklik yet, papamama i ken helpim ol long kisim dispela laik bilong helpim ol narapela na mekim bikpela wok moa bilong autim tok. Ol pikinini bai lukim pasin bilong wan wan long famili long wok strong na mekim bikpela wok moa bilong autim tok. Wanpela brata, taim em i yangpela mangi yet em i save wok wantaim bubu man bilong em long mekim ol wok bilong kongrigesen, olsem na dispela i kirapim em long mekim bikpela wok moa. Em i lukim bubu man i amamas na wok strong, na dispela i kirapim em long painim ol rot bilong mekim wok bilong helpim ol brata. Long nau em i mekim wok olsem kongrigesen sevan.
5 Sot Long Ol Brata: “Sapos man i laik i stap wasman . . . , em i laikim gutpela wok.” (1 Ti. 3:1) Dispela tok i kirapim ol brata long wok strong long winim sampela mak bilong kisim sampela wok moa long oganaisesen bilong Jehova. Dispela i no makim olsem brata i mas i gat wanpela kain bikpela save bilong mekim olsem, nogat. Brata i laik kisim sampela wok moa, em bai putim ol samting bilong Kingdom i stap namba wan na wok strong long autim tok. (Mt. 6:33; 2 Ti. 4:5) Em bai wok strong long i stap gutpela piksa ol narapela i ken bihainim.
6 Long Olgeta Hap: Jehova i wok long hariapim wok bilong bungim ol manmeri. (Ais. 60:22) Em i bikpela samting long olgeta man i bihainim pasin bilong Jisas ol i mas mekim tru dispela wok bilong autim tok. Ripot bilong olgeta hap long sevis yia bilong 2006 i tok 248,327 manmeri i bin kisim baptais. Dispela i makim olsem long olgeta wan wan de inap 680 nupela i bin kisim baptais! Yumi olgeta i ken wok yet long painim ol rot bilong mekim moa yet wok bilong autim tok.