Autim Tok Long Ol Wanblut—Olsem Wanem Yumi Ken Mekim?
1 Yumi bai amamas tru long i go insait long nupela taim wantaim ol wanblut bilong yumi, na wanbel wantaim ol long lotuim Jehova, a? Long rot bilong autim tok long ol wanblut, dispela gutpela samting inap kamap tru tru. Tasol bilong mekim olsem, yumi mas bihainim gutpela tingting. Wanpela wasman sekit i tok: “Ol bratasista i save autim liklik tok tasol long ol wanblut bilong kirapim laik bilong ol, na wok bilong ol i save karim gutpela kaikai.” Olsem wanem yumi ken mekim olsem?
2 Kirapim Laik Bilong Ol: Tingting gut pastaim long olsem wanem yu inap kirapim laik bilong ol wanblut bilong yu long harim tok. (Snd. 15:28) Wanem ol samting ol i tingting planti long en? Ol i gat wanem ol hevi? Ating yu ken soim ol wanpela stori long buk samting o wanpela skripsa i toktok long wanpela samting em ol i laik save long en. Sapos ol wanblut bilong yu i no stap klostu long yu, yu ken mekim olsem long rot bilong pas o long telefon. No ken mekim planti tok tumas, planim pikinini bilong tok i tru, na wetim Jehova i mekim ol i kamap.—1 Ko. 3:6.
3 Jisas i tokim wanpela man em i bin rausim spirit nogut long em olsem: “Yu go long haus bilong yu na long ol wanlain bilong yu. Na yu tokim ol long olgeta samting Bikpela i bin mekim bilong helpim yu, na long em i bin marimari long yu.” (Mk. 5:19) Tingim samting dispela mirakel i mas mekim long ol wanblut bilong dispela man! Tru samting olsem i no inap painim yu, tasol ating ol wanblut i laik save long ol samting yu o ol pikinini bilong yu i mekim. Yu ken stori long wanpela tok yu mekim long Skul Tiokratik Bilong Autim Tok, o wanpela kibung yu bin go long en, o yu go raun lukim Betel, o wanpela bikpela samting i kamap na dispela inap opim rot long yu toktok wantaim ol long Jehova na oganaisesen bilong em.
4 Bihainim Gutpela Tingting: Taim yumi autim tok long ol wanblut, no ken mekim planti tok tumas long wanpela taim tasol. Wanpela brata i tingim bek long taim em i kirap stadi long Baibel, na em i tok: “Inap planti aua mi tokim mama bilong mi long olgeta samting mi lainim long Baibel, na planti taim dispela i save kamapim kros, moa yet wantaim papa bilong mi.” Long taim wanblut i kamapim olsem em i gat laik long save long tok bilong Baibel, yu mas kamapim tok long pasin we i kirapim laik bilong em long save moa. (Snd. 25:7) Olgeta taim soim rispek, mekim gutpela pasin, na no ken les kwik long em, wankain olsem yu save mekim long wanpela man yu no save long em long taim yu autim tok.—Kl. 4:6.
5 Wanpela taim ol wanblut bilong Jisas i ting em i longlong. (Mk. 3:21) Tasol bihain, sampela bilong ol i kamap bilipman. (Ap. 1:14) Sapos yu traim long autim tok long ol wanblut bilong yu tasol ol i no laikim, orait yu no ken les. Sindaun na pasin bilong ol inap senis. Wok yet long painim rot bilong kamapim wanpela tok em inap kirapim laik bilong ol long harim tok. Yu inap helpim ol long kirap wokabaut long rot bilong kisim laip oltaim.—Mt. 7:13, 14.
[Askim Bilong Stadi]
1. Bilong wanem yumi mas bihainim gutpela tingting taim yumi autim tok long ol wanblut?
2. Olsem wanem pasin bilong tingim ol wanblut i helpim yumi long kirapim laik bilong ol long harim tok?
3. Olsem wanem ol samting bilong yumi em ol wanblut i laik save long en inap opim rot long yumi autim tok long ol?
4. Yumi no ken mekim wanem taim yumi autim tok long ol wanblut bilong yumi?
5. Yumi mas mekim wanem sapos ol wanblut i no amamas long harim tok taim yumi autim tok long ol?