Olsem Wanem Long Ol Wanblut Bilong Yu?
1 Planti bilong yumi i gat sampela wanblut em ol i no i stap long tok i tru. Yumi laik tru bai ol dispela wanblut i kam wokabaut wantaim yumi long rot bilong laip! Sapos ol i famili tru tru bilong yumi, yumi tingim moa yet i stap bilong ol long bihain. Maski yumi bin traim inap planti yia pinis long kirapim ol long laikim tok i tru, yumi no ken ting i no gat wanpela gutpela samting inap kamap.
2 Taim Jisas i mekim wok autim tok, “ol brata bilong en tu ol i no bilip long em.” (Jo 7:5) Wanpela taim ol wanblut i ting em i longlong. (Mk 3:21) Tasol, Jisas i no ting ol i nogut pinis. Bihain, ol brata bilong em i kisim tok i tru. (Ap 1:14) Brata bilong em Jems i kamap wanpela bikman bilong kongrigesen Kristen. (Ga 1:18, 19; 2:9) Sapos yu laik bai ol wanblut bilong yu i kisim tok i tru, no ken lusim pasin bilong autim gutnius bilong Kingdom long ol.
3 Mekim Ol i Amamas, No Ken Daunim Ol: Taim Jisas i autim tok long ol narapela, ol i amamas, ol i no pilim olsem tok bilong em i daunim ol. (Mt 11:28, 29) Em i no mekim planti tumas tok na bai ol i no kisim gut. Bilong helpim ol wanblut long laikim tok i tru, mekim ol sotpela tok na no ken mekim planti tok tumas long ol! Wanpela wasman bilong raun i tok: “Ol brata sista i save autim liklik tok tasol long ol wanblut bilong kirapim tingting bilong ol, wok bilong ol i save karim gutpela kaikai.” Maski wanpela wanblut i save birua long yu, ating long dispela rot em bai mekim sampela askim, na isi isi em bai kirap long laikim tok i tru.—1 Pi 2:2; skelim wantaim 1 Korin 3:1, 2.
4 Planti marit Kristen i autim tok long poroman marit i no bilip long dispela rot: Ol i bin opim ol buk o magasin long ol stori poroman i save laikim na larim i stap ples klia liklik, na dispela i kamapim gutpela samting. Wanpela sista i bin mekim olsem, em i stadi tu wantaim ol pikinini bilong em taim man bilong em i stap klostu na em i ken harim ol tok, na sista i kamapim gut ol tok em inap helpim man bilong em. Sampela taim em i askim em: “Nau long san mi stadi na mi kisim save olsem olsem. Yu ting olsem wanem long dispela tok?” Bihain man bilong em i kisim tok i tru.
5 Harim Tok Bilong Ol, Isi Long Ol: Wanpela pablisa i tok olsem, “ol wanblut na famili i gat tingting na laik bilong ol yet.” Olsem na taim ol i kamapim tingting bilong ol o sapos ol i tok ol i no laik bai yumi autim tok long ol, orait yumi mas harim tok bilong ol. (Sav 3:7; 1 Pi 3:15) Taim yumi mekim pasin isi na pasin sori na putim gut yau long tok bilong ol, yumi inap painim rot bilong autim gut tok long ol. Kain pasin olsem inap kamapim gutpela kaikai, olsem stori bilong wanpela man marit Kristen i kamapim. Inap 20 yia em i karim hevi em meri bilong em i no bilip i putim long em. Taim meri i kirap long senisim pasin bilong em, man i tok: “Mi amamas tru long Jehova i bin helpim mi long bihainim pasin bilong no ken belhat kwik, long wanem, nau mi ken lukim kaikai bilong en: Meri bilong mi i kirap long wokabaut long rot i go long laip!”
6 Olsem wanem long ol wanblut bilong yu? Ating ol gutpela pasin Kristen bilong yu na ol beten yu save mekim bilong tingim ol, dispela inap helpim ol na ol i kam lotuim Jehova.—1 Pi 3:1, 2,