Insait Long Wok Em i No Inap Kamap Gen
1 Long bipo, long narapela narapela taim Jehova i mas givim strafe long ol birua bilong em. Tasol em i God bilong sori, olsem na em i bin opim rot bilong ol gutpela man i ken abrusim bagarap. (Sng 103:13) Ol i harim tok bilong em o ol i no harim, em dispela tasol i makim wanem samting bai painim ol long bihain.
2 Olsem: Paslain long Bikpela Tait, long yia 2370 B.C.E., Noa em i “man bilong tokaut long stretpela pasin.” Ol manmeri i sakim tok God i givim long ol, ol i bin bagarap. (2 Pi 2:5; Hi 11:7) Paslain long taim Jerusalem i bagarap long yia 70 C.E., Jisas i bin tokaut klia long ol samting ol man i mas mekim bilong abrusim bagarap em bai painim dispela taun. Ol manmeri i bin sakim tok bilong em, ol i bin kisim bagarap. (Lu 21:20-24) Long bipo, inap planti taim God i bin givim toksave na strafe long ol man.
3 Wok Bilong Toksave Long Nau: Long bipo yet, Jehova i bin tokaut olsem em bai kamapim belhat bilong em long ol man nogut bilong nau, na ol man i gat pasin daun ol tasol bai abrusim bagarap. (Sef 2:2, 3; 3:8) I no gat bikpela hap taim moa bilong autim tok long dispela samting! Taim bilong “bikpela hevi tru” i kam klostu pinis, na yumi wok long bungim ol man i gat pasin daun. Tru tumas, long “gaden” ol “kaikai i redi pinis” bilong yumi ken kisim. Olsem na i no gat narapela wok em i bikpela samting na yumi mas mekim hariap olsem dispela wok.—Mt 24:14, 21, 22; Jo 4:35.
4 Yumi mas insait long wok bilong toksave long ol narapela long nau, ‘maski ol i harim o nogat.’ Dispela em wok God i givim long yumi na yumi mas mekim. (Ese 2:4, 5; 3:17, 18) Taim yumi insait tru long mekim dispela wok, dispela i kamapim klia olsem yumi laikim tru God, na yumi tingim tru ol man i stap klostu long yumi, na yumi bilip tru long Man bilong kisim bek yumi, em Krais Jisas.
5 Nau Em i Taim Bilong Mekim Wok: Long bipo, taim Jehova i kamapim strafe bilong em, pasin nogut i save kamap gen, long wanem, Satan na ol spirit nogut bilong em ol i stap yet. Tasol long dispela taim em bai narakain. Wok bilong Satan long paulim ol man bai pinis. Bai i no gat wok moa bilong autim wanpela toksave long olgeta hap olsem wanpela “bikpela hevi tru” i kam klostu pinis. (KTH 7:14, NW; Ro 16:20) Yumi gat gutpela wok tru, long wanem, yumi insait long wanpela wok em i no inap kamap gen. Nau em taim bilong mekim tru dispela wok.
6 Aposel Pol i toktok long wok autim tok em i bin mekim na em i tok olsem: “Sapos wanpela namel long yupela em i lus, dispela em i no asua bilong mi.” (Ap 20:26) Em i no pilim olsem em i gat asua long wanem em i no bin autim toksave. Long wok bilong em, em inap tok olsem: “Mi save hatwok tru long mekim dispela wok.” (Kl 1:29) Yumi ken kisim wankain amamas taim yumi givim bel tru long mekim dispela wok—em dispela wok i no inap kamap gen!—2 Ti 2:15.