‘Kisim Strong Long Ol Tok Yumi Bilip Long En’
1 Yumi mas wok strong tru bambai yumi ken bihainim pasin bilong givim bel bilong yumi long God. (1 Ti. 4:7-10) Sapos yumi traim long mekim dispela long strong bilong yumi yet, i no longtaim na bai strong bilong yumi i pinis na yumi pundaun. (Ais. 40:29-31) Wanpela rot bilong kisim strong long Jehova em long rot bilong kisim “ol gutpela tok yumi bilip long en.”—1 Ti. 4:6.
2 Planti Gutpela Kaikai Bilong Spirit: Long rot bilong Baibel na “wokboi i gat gutpela tingting,” Jehova i save givim gutpela kaikai bilong spirit. (Mt. 24:45) Olsem wanem? Yumi save mekim ol samting bambai dispela kaikai i ken helpim yumi? Yumi save ritim Baibel long olgeta de? Yumi save makim taim bilong stadi na tingim tingim ol tok long bel? (Sng. 1:2, 3) Pasin bilong kisim gutpela kaikai bilong spirit bai strongim yumi na i lukautim yumi long ol samting em graun bilong Satan i mekim bilong daunim yumi. (1 Jo. 5:19) Sapos yumi pulimapim tingting bilong yumi long ol gutpela samting na bihainim long laip bilong yumi, orait Jehova bai stap wantaim yumi.—Fl. 4:8, 9.
3 Jehova i save strongim yumi long rot bilong ol miting bilong kongrigesen tu. (Hi. 10:24, 25) Ol gutpela tok bilong spirit yumi kisim long ol dispela miting na pasin bilong bung wantaim ol bratasista spirit i save strongim yumi long sanap strong long taim bilong hevi. (1 Pi. 5:9, 10) Wanpela yangpela Kristen i tok: “Mi save go long skul long olgeta de, na dispela i daunim tru strong bilong mi. Tasol ol miting i olsem gutpela wara i kamap long ples drai we mi save kisim nupela strong bilong go long skul long neks de.” Yumi kisim planti gutpela samting taim yumi wok strong long go long ol miting!
4 Autim Tok i Tru: Wok bilong autim tok i olsem kaikai bilong Jisas. Dispela wok i givim strong long em. (Jo. 4:32-34) Na olsem tasol, taim yumi tokim ol narapela man long ol gutpela tok promis bilong God, yumi kisim strong. Taim yumi givim bel long wok autim tok, dispela i helpim yumi long tingting long Kingdom na ol blesing klostu nau bai kamap. Dispela i givim tru nupela strong long yumi.—Mt. 11:28-30.
5 Em i gutpela samting tru long yumi inap kisim gutpela kaikai bilong spirit em Jehova i save givim long lain bilong em long nau! Gutpela sapos yumi wok yet long amamas long litimapim nem bilong em.—Ais. 65:13, 14.