“Bikpela i Save Strongim Ol Man i No Gat Strong”

¹ Skin bilong yumi olgeta i save les long sampela taim. Ating skin i les, long wanem, yumi mekim kain kain wok, na tu, ol hevi i save painim yumi long dispela “taim bilong las de.” (2 Ti. 3:⁠1) Olsem wanem yumi ol wokman bilong Jehova i ken kisim strong long ol samting bilong spirit na bai yumi no slek long mekim wok autim tok? Yumi mekim olsem long rot bilong bilip long dispela man husat i gat “olgeta strong.” (Ais. 40:26) Em i save long ol samting yumi mas kisim na em i gat laik tru long helpim yumi.​—⁠1 Pi. 5:⁠7.

² Ol Rot Bilong Jehova Long Helpim Yumi: Jehova i save strongim yumi long rot bilong holi spirit bilong em, em dispela wankain bikpela strong em i bin yusim bilong wokim heven na graun. Spirit bilong God i helpim yumi long “stap strong” sapos strong bilong yumi i laik pinis. (Ais. 40:31) Askim yu yet, ‘Wanem laspela taim mi bin beten askim Jehova long givim holi spirit bilong strongim mi long mekim ol wok Kristen bilong mi?’​—⁠Lu. 11:​11-​13.

³ Yumi mas ritim na tingim tingim long bel Tok Bilong God long olgeta de na kisim kaikai bilong spirit long rot bilong ritim oltaim ol buk na nius Kristen bilong yumi. Long dispela rot bai yumi stap olsem strongpela “diwai ol man i bin planim klostu long wara. Em i save karim kaikai long taim bilong em stret, na lip bilong en i no save drai.”​—⁠Sng. 1:​2, 3.

⁴ Jehova i save mekim tu wok long ol wanbilip Kristen husat i ken “helpim” yumi gut tru. (Kl. 4:​10, 11) Ol i save strongim yumi long ol miting bilong kongrigesen taim yumi toktok wantaim ol, ol i bekim tok, na mekim ol tok long pletfom. (Ap. 15:32) Ol elda Kristen i mekim bikpela wok moa bilong helpim yumi long ol samting bilong spirit na i givim nupela strong long yumi.​—⁠Ais. 32:​1, 2.

⁵ Wok Autim Tok: Sapos yu pilim olsem strong bilong yu i laik pinis, yu no ken lusim wok autim tok! Planti narapela wok i save pinisim strong, tasol pasin bilong autim tok oltaim i save givim nupela strong long yumi. (Mt. 11:​28-​30) Taim yumi autim gutnius, dispela i helpim yumi long putim tingting bilong yumi long Kingdom Bilong God na tingim laip oltaim na ol gutpela samting dispela bai kamapim.

⁶ I gat planti wok bilong mekim paslain long pasin nogut bilong dispela graun i pinis. I gat as tru na yumi mas stap strong long wok bilong yumi, na “mekim dispela wok long strong God i save givim.” (1 Pi. 4:11) Long rot bilong helpim Jehova i save givim, bai yumi pinisim wok bilong yumi, long wanem, em “i save strongim ol man i no gat strong.”​—⁠Ais. 40:⁠29.