“Redi Long Mekim Olgeta Kain Gutpela Wok”
1 Lain bilong Jehova long nau i save kisim planti gutpela gutpela kaikai bilong spirit. (Ais 25:6) Yumi inap kisim planti gutpela tok bilong Baibel long rot bilong stadi bilong yumi yet na famili-stadi, na long ol miting bilong kongrigesen, ol kibung sekit, na ol kibung distrik. Tasol olsem wanem? Yumi kisim gut olgeta dispela kaikai bilong spirit bambai yumi inap ‘kisim tru olgeta gutpela pasin, na bai yumi i redi long mekim olgeta kain gutpela wok’?—2 Ti 3:17.
2 Tingim ol kaikai bilong spirit bilong yia 1998, em 6-pela mun bilong en i pinis nau! Long rot bilong ol miting bilong kongrigesen long olgeta wik, yumi wok long kisim save long sampela bikpela tok bilong 23 buk bilong Ol Skripsa Grik, na tu, yumi stori gen long 60 pes bilong buk Save, na harim ol tok ol brata i kamapim long sampela stori bilong Wastaua. Na tu, yumi save kisim ol gutpela kaikai long rot bilong 12-pela Wok Kingdom, na sampela taim pepa “Spirit Bilong God Yet i Bin Kamapim Olgeta Tok i Stap Long Buk Bilong God. Na Dispela Tok Em i Gutpela Samting Tru” i stap long en. Long rot bilong Wastaua yumi kisim 52 stori bilong stadi long en, na long planti kongrigesen, ol i save mekim planti pablik-tok i kamapim narapela narapela tok bilong Baibel. Na tu, yumi gat ol gutpela kibung distrik na kibung sekit na bikpela de kibung. Tru tumas, God i bin givim yumi planti gutpela samting bilong spirit!
3 Pilim Tru Ol Samting Jehova i Save Givim Yumi: Bilong ol dispela samting i ken helpim gut yumi, yumi mas save i gat wanem as na Jehova i givim yumi planti kaikai bilong spirit. Taim yumi kisim ol dispela gutpela kaikai bilong spirit, dispela i save strongim bilip bilong yumi na i save helpim yumi long pas gut wantaim em. (1 Ti 4:6) Tasol God i no givim yumi ol dispela kaikai bilong spirit bambai yumi yet i ken kisim save, na em tasol, nogat. Dispela kaikai i save kirapim yumi long toktok wantaim ol narapela long tok i tru na i save inapim yumi long mekim gut dispela wok bilong autim gutnius.—2 Ti 4:5.
4 Yumi no ken sakim ol kaikai bilong spirit em yumi mas kisim, oltaim yumi mas i gat laik long kisim ol gutpela gutpela kaikai bilong spirit i kam long tebol spirit bilong Jehova. (Mt 5:3; 1 Pi 2:2) Bilong ol dispela samting i ken helpim gut yumi, yumi mas makim taim inap long mekim ol bikpela samting olsem: Stadi bilong yumi yet, na famili-stadi, na go long ol miting long olgeta taim. (Ef 5:15, 16) Taim yumi mekim olsem, bai yumi kisim ol gutpela blesing i stret wantaim tok Pol i raitim i go long ol Kristen Hibru bilong strongim ol, olsem i stap long Hibru 13:20, 21.