De Bilong Jehova i Kam Klostu Pinis
1 Ol Kristen i wetim tru de bilong Jehova, em long rot bilong en Jehova bai bagarapim ol samting bilong dispela graun na kamapim nupela taim i gat stretpela pasin long en. (2 Pi. 3:12, 13) Yumi no save wanem taim dispela de bai kam, olsem na yumi mas was i stap na helpim ol narapela long mekim olsem tu. (Ese. 33:7-9; Mt. 24:42-44) Sapos yumi tingim tingim long bel ol tok profet bilong God dispela bai strongim bilip bilong yumi olsem “de bilong Bikpela i mekim kot bilong en, em i klostu nau.”—Sef. 1:14.
2 Ol Bikpela Gavman Bilong Graun: Long Kamapim Tok Hait 17:9-11, aposel Jon i stori long “7-pela king,” em ol i makim ol bikpela gavman, em narapela i kamap bihain long narapela. Jon i stori tu long “namba 8 king,” em long nau i makim Yunaitet Nesen. Olsem wanem? Bai i gat sampela narapela bikpela gavman i kamap? Nogat, dispela tok profet i tok olsem dispela namba 8 king “bai i lus olgeta,” na bihain long en Baibel i no stori long sampela bikpela gavman moa bai kamap. Dispela tok profet i helpim yumi long luksave yumi stap long wanem taim, a?
3 Tok bilong Daniel 2:31-45 i helpim yumi long kliagut long de bilong Jehova. Long dispela tok profet, traipela imis em Nebukatnesar i bin lukim long driman i makim ol bikpela gavman bilong graun, em narapela i kamap bihain long narapela. Olgeta wan wan bilong ol dispela gavman i bin kamap pinis. Orait nau yumi stap long wanem taim? Long dispela haptaim em lek bilong dispela imis i makim. Dispela tok profet i stori gut long wanem samting bai kamap bihain long en. Ol gavman bilong ol man bai bagarap olgeta, na “God bai i kirapim wanpela kingdom na dispela kingdom bai i stap oltaim oltaim.” Yu inap luksave olsem wanem dispela i kamapim olsem de bilong Jehova i kam klostu pinis?
4 Sampela Save Moa: Long ai bilong yumi yet yumi inap lukim ol samting i kamapim klia olsem de bilong Jehova i kam klostu pinis. Yumi lukim truim bilong ol samting aposel Pol i tok profet long en long ol pasin bilong ol man long “taim bilong las de.” (2 Ti. 3:1-5) Na yumi insait long wok bilong autim gutnius long olgeta hap em dispela wok i mas kamap paslain long las de i kam. (Mt. 24:14) Wok bilong yumi long autim tok i mas kamapim klia dispela tokaut bilong ensel: “Taim i kamap pinis bilong God i skelim pasin bilong olgeta man long kot. Olsem na yupela i mas pret long em na litimapim nem bilong em.”—KTH 14:6, 7.