Ol Bikpela Gavman Baibel i Stori Long En Ol i Mas Pinis!

YU TING ol man inap raitim stori long ol samting bai kamap bihain? Ating bai yu tok, i no inap. Tasol i gat wanpela buk i bin stori long ol samting bai kamap bihain, na i no bihain liklik−nogat−em i stori long ol samting bai kamap planti handet o planti tausen yia bihain! Buk hia, em Baibel.

Baibel i save kolim stret ol samting i save kamap, na Baibel i bin kolim ol samting bai painim lain bilong God, kirap long taim bilong Babilon bilong bipo, em olsem 2,500 yia bipo, na i kam inap long nau, na bihain tu.

Danyel em wanpela profet bilong bipo, na em i bin kisim save long ol samting bai kamap bihain. Em i bin kisim we dispela save? Em yet i tok: “I gat wanpela God i stap long heven em i Man bilong kamapim long ples klia ol samting i stap hait.” (Danyel 2:​28, NW ) Sampela man i bin digim graun na ol i painim ol samting bilong ol man ol i bin stap long taim bilong ol bikpela gavman bilong bipo, na ol dispela samting i truim ol stori bilong Baibel na ol tok profet bilong en.

Isip na Asiria em tupela bikpela gavman i bin stap paslain long taim bilong Danyel, na long taim bilong Danyel bikpela gavman Babilon i stap bosim ol man, na God i givim save long Danyel long tupela bikpela gavman moa bai kamap bihain long taim bilong Danyel. (Danyel 2:​47, 48; 8:​20, 21) Na bihain long dispela, tupela moa bai kamap, na nau yumi kamap long taim bilong yumi.

Hamas Bikpela Gavman?

Baibel i kolim hamas bikpela gavman bai kamap? God i givim save long lapun aposel Jon, na sapos yumi skelim tok bilong Jon bai yumi ken save, nau yumi stap long taim bilong wanem bikpela gavman. Ensel i tokim Jon olsem: “Dispela 7-pela het i makim 7-pela king. 5-pela ol i bagarap pinis, na wanpela nau i stap, na wanpela i no kamap king yet.”−Revelesen 17:⁠10.

Wanem ol 5-pela bikpela gavman i bin kamap na i stap na bihain moa i bagarap paslain long taim bilong Jon? Dispela 5-pela em olsem: Isip na Asiria na Babilon na Midia wantaim Pesia na Grik. Na wanem dispela narapela em Jon i tok nau i stap? Em Rom. Na wanem dispela narapela em Jon i tok “i no kamap king yet”? Em Englan wantaim Amerika, nau dispela i stap long taim bilong yumi. Ol dispela bikpela gavman i bin mekim sampela ol samting long lain bilong God, long bipo na long nau.

Wanpela bikpela samting yumi mas save long en em olsem: Bai i gat 7-pela tasol bikpela gavman, em narapela i senisim narapela! Na Baibel i tok, narapela bai kamap, em i olsem namba 8, na insait long dispela namba 8 gavman i gat sampela hap lain bilong ol dispela narapela 7-pela; na dispela namba 8 bai kamap taim namba 7 i stap na i bilong i stap sotpela taim tasol. (Revelesen 17:​10, 11) Nau yumi stap long taim bilong laspela bikpela gavman bilong graun i stap bosim ol man. I no ken narapela bikpela gavman bilong graun i kamap bihain long dispela!

Liklik taim bai olgeta dispela bikpela gavman bilong graun i pinis olgeta na i no gat moa. Danyel i tok, klostu nau bai ol i kisim bagarap na ‘win bai karim pipia bilong en i go nabaut.’ (Danyel 2:35) Wanem samting bai senisim ol dispela gavman? Em wanpela gutpela gavman tru! Danyel i tok: “Long taim bilong ol dispela king God bilong heven bai kamapim wanpela kingdom i no inap bagarap. . . . Em bai bagarapim na pinisim ol dispela narapela kingdom, na em wanpela bai stap inap long taim bihain bihain.” (Danyel 2:​44, NW ) Kingdom bilong God bai senisim ol dispela gavman bilong ol man. Em bai winim ol gavman bilong man long bosim graun!

Ating yu save liklik long ol dispela bikpela gavman i bin kamap long graun, tasol yu laik save long pasin na lotu bilong ol na ol i mekim wanem long lain bilong God, na tok profet bilong Baibel i tok olsem wanem long ol? Sapos yu kisim save long ol dispela samting bai yu save gut long stori bilong ol lain man bilong bipo na Baibel i tok wanem long ol.

Olsem na mipela i amamas long raitim 8-pela stori long ol dispela bikpela gavman. Dispela hia em namba wan. Ol dispela stori bai helpim yu na bai yu ken save, ol stori bilong Baibel i tru na yu inap bilip tru long en!