Wok Autim Tok i Helpim Yumi Long Sanap Strong
1 Baibel i tokim yumi long “ran strong long dispela resis God i bin makim bilong yumi ran long en.” (Hi. 12:1) Olsem man i ran long resis i mas sanap strong bilong em i ken winim resis, yumi tu i mas sanap strong bilong kisim laip i stap gut oltaim. (Hi. 10:36) Olsem wanem wok Kristen i helpim yumi long sanap strong i go inap long pinis?—Mt. 24:13.
2 Ol Samting Bilong Spirit i Strongim Yumi: Wok bilong yumi long autim gutpela tok promis bilong Baibel long nupela taim i gat stretpela pasin long en, i helpim yumi long bilip na wet long ol gutpela samting bai kamap bihain. (1 Te. 5:8) Taim yumi autim tok oltaim, yumi gat rot long tokim ol narapela man long ol tok i tru yumi bin lainim long Baibel. Yumi gat rot long sambai long bilip bilong yumi, em dispela samting i save strongim yumi long ol samting bilong spirit.
3 Bilong yumi ken skulim gut ol narapela, yumi yet i mas kliagut long ol tok i tru bilong Baibel. Yumi mas mekim wok painimaut na skelim long bel ol tok. Pasin bilong yumi long wok strong i mekim save bilong yumi i go bikpela, na i strongim bilip bilong yumi, na givim yumi nupela strong long ol samting bilong spirit. (Snd. 2:3-5) Olsem na taim yumi wok long helpim ol narapela, yumi strongim yumi yet.—1 Ti. 4:15, 16.
4 Pasin bilong givim bel long autim tok em i bikpela hap bilong ‘olgeta klos pait God i save givim yumi,’ em yumi mas i gat bambai yumi inap sanap strong na sakim Satan na ol spirit nogut. (Ef. 6:10-13, 15) Pasin bilong yumi long givim bel long mekim wok bilong God i helpim yumi long putim tingting bilong yumi long ol gutpela samting na sakim pasin bilong graun bilong Satan na bai em i no ken paulim yumi. (Kl. 3:2) Taim yumi lainim ol narapela long ol rot Jehova i makim, dispela i helpim yumi long tingim olsem wokabaut bilong yumi yet i mas stret.—1 Pi. 2:12.
5 God i Strongim Yumi: Pasin bilong yumi long insait long wok autim tok i skulim yumi long bilip long Jehova bai strongim yumi. (2 Ko. 4:1, 7) Em i wanpela gutpela samting tru! Taim yumi kisim dispela kain bilip, dispela i helpim yumi long mekim wok Kristen bilong yumi, na tu, em i helpim yumi long karim wanem wanem hevi inap painim yumi. (Fl. 4:11-13) Tru tumas, taim yumi lain long bilip tru long Jehova, dispela em i bikpela samting bilong helpim yumi long sanap strong. (Sng. 55:22) Long planti rot, wok autim tok i helpim yumi long sanap strong.