Helpim Ol Pikinini Bilong Yu Long Mekim Gut Wok Autim Tok
1 Ol papamama Kristen i gat bikpela wok long skulim pikinini bilong ol long insait long wok autim tok taim ol i liklik yet. I gat kain kain rot bilong mekim olsem. Sampela pikinini inap kolim tok bilong wanpela skripsa paslain long ol i save long rit. Dispela inap kirapim tru tingting bilong ol man. Taim ol pikinini i wok long i go bikpela, ol inap mekim planti samting moa long wok autim tok. Yupela ol papamama inap mekim wanem bilong helpim pikinini bilong yupela long insait long wok autim tok? Ating ol dispela tok inap helpim yupela.
2 Taim yu tok gude pinis, yu inap tok:
◼ “Pikinini man bilong mi, [nem bilong em], i laik kamapim wanpela skripsa long yu.” Pikinini inap tok: “Dispela skripsa long Buk Song i lainim mi olsem God i tok promis pinis long bagarapim ol man nogut na lukautim ol gutpela man. [Pikinini i ritim o kolim tok bilong Song 37:10, 11.] Ol dispela nius i stori long ol samting God Jehova bai mekim bilong helpim yumi. Inap mi lusim ol dispela nius wantaim yu?” Yu inap pinisim tok long rot bilong stori long ol kontribiusen i helpim wok bilong yumi long olgeta hap.
3 O yu ken mekim dispela tok:
◼ “Gude. Mi skulim pikinini meri bilong mi, [nem bilong em], long tingim ol narapela man long dispela komiuniti. Em i laik kamapim wanpela sotpela tok bilong Baibel long yu.” Pikinini inap tok: “Wanpela rot mi laik helpim ol man long en, em mi laik kamapim tok bilong Baibel long ol gutpela samting bai kamap bihain. [Pikinini i ritim o kolim tok bilong Kamapim Tok Hait 21:4.] Ol dispela nius i stori long ol samting Kingdom Bilong God bai mekim bilong helpim yumi. Mi ting yu bai amamas long ritim ol dispela nius.”
4 Taim ol pikinini i mekim oltaim ol tok i no hatwok long mekim, dispela i strongim ol long ting olsem ol i gat save long autim tok bilong Kingdom. Pasin bilong mekim traim long toktok klia na long strongpela nek bai helpim ol pikinini long toktok wantaim kain kain man. Pasin bilong redi gut pastaim long mekim wok autim tok na mekim tok amamas long ol pikinini bai helpim ol long kamapim bilip bilong ol.
5 Dispela wok bilong strongim ol pikinini i mekim na planti yangpela i winim mak bilong kamap pablisa i no baptais. Yumi amamas tru long lukim ol pikinini bilong yumi i lain long mekim gut wok Kristen bilong autim tok!—Sng. 148:12, 13.