Ol Papamama—Lainim Pikinini Bilong Yupela Long Autim Tok
1 I gat planti pikinini long ol kongrigesen bilong yumi em ol i gat bikpela laik long mekim wok bilong God. (Sav 12:1) Ol tu i insait long lain em Jehova i singautim ol bilong litimapim nem bilong em. (Sng 148:12-14) Olsem na taim ol papamama i wok long lainim ol pikinini long olgeta wan wan de, ol i mas skulim ol tu long olsem wanem ol i ken autim bilip bilong ol long ol narapela long rot bilong wok autim tok.—Lo 6:6, 7.
2 Lainim Ol Pikinini Long Kamap Strong: Taim ol pikinini i liklik yet, i stret papamama i mas lainim ol long go autim tok wantaim ol. Paslain long yupela i go autim tok, yupela i mas redim gut ol pikinini bilong yupela bambai ol i ken mekim sampela gutpela wok. Long haus yet yupela i mas tokim ol long ol samting yupela i laik bai ol i ken mekim taim yupela i go long haus bilong ol man. Ol liklik pikinini i ken tilim ol liklik nius o tanget na singautim ol man i kam long Haus Kingdom. Yupela i ken askim ol yangpela em ol inap kaunim gut tok long kaunim Baibel. Ol i ken mekim ol sotpela tok bilong tilim ol magasin. Taim ol i wok long kisim save, lainim ol long mekim wok long Baibel taim ol i toktok wantaim ol man. Planti yangpela pablisa ol i bin kirap long go oltaim long ol man bilong tilim ol nupela magasin long ol na long mekim ol gobek. Gutpela ol pikinini i ken wok wantaim man i bikpela pinis na i no wantaim narapela yangpela. Man i bikpela pinis em i ken tokim man bilong haus olsem dispela yangpela i wok long lain long mekim wok autim tok.
3 Wanpela liklik pikinini meri i bin askim ol elda long helpim em bambai em i ken winim mak bilong kamap pablisa bilong Kingdom. Maski em i gat 5-pela krismas tasol long dispela taim, na em i no save long rit, em inap autim gut tok bilong Kingdom long ol man. Em inap tingim ples sampela tok bilong Baibel i stap long en, na taim em i painim pinis, em i save askim man bilong haus long kaunim, na bihain em i kamapim insait bilong en.
4 Na tu, pasin bilong ol papamama long makim taim bilong insait long wok autim tok em inap lainim ol pikinini. Ol papamama i mas wokim gutpela sedyul bilong autim tok long olgeta wik na bihainim dispela sedyul, na bai ol pikinini i ken save wanem hap taim insait long wik em i taim bilong autim tok.
5 Taim ol papamama i lainim ol pikinini taim ol i stap liklik yet long laikim na amamas long mekim wok autim tok, dispela bai kirapim ol long wok strong long mekim sampela bikpela wok long bihain, ating ol bai mekim wok painia tu. (1 Ko 15:58) Yumi olgeta i mas strongim ol pikinini i stap namel long yumi long kamap strong long litimapim nem bilong Jehova.
This article is repeated in km 1/99