Kisim Pasin Bilong Toktok Gut Wantaim Ol Man
1 Tok aposel Pol i mekim long haus lotu long Antiok long Pisidia i stap long Aposel 13:16-41, em i gutpela stori bilong lainim yumi long pasin bilong toktok gut wantaim ol man. Pol i tingim sindaun na tingting bilong ol man i harim tok bilong em na em i mekim tok i stret bilong helpim ol. Taim yumi skelim dispela stori, yumi mas tingim olsem wanem yumi ken bihainim pasin bilong Pol taim yumi autim tok.
2 Toktok Long Ol Samting Em Yupela i Wanbel Long En: Tru as bilong tok Pol i autim em bikpela wok bilong Jisas insait long ol samting Jehova i laik mekim bilong kamapim laik bilong em, tasol Pol i no stori long dispela samting pastaim. Em i toktok long samting em na ol lain Juda i harim tok bilong em i wanbel long en—em stori bilong lain Juda long bipo. (Ap. 13:16-22) Olsem tasol, yumi inap helpim ol man sapos yumi wok strong long kamapim ol tok ol inap wanbel long en. Bilong mekim olsem yumi mas kamapim ol gutpela askim bilong kirapim ol long kamapim tingting bilong ol na yumi mas putim gut yau na bai yumi ken save long ol samting i bikpela samting long ol.
3 Taim Pol i stori long ol samting i bin kamap long lain Juda long bipo, em i kirapim ol man i harim tok bilong em long tingim tok promis bilong God long kamapim wanpela Man long lain tumbuna bilong Devit long kisim bek ol. Tasol planti Juda i wetim wanpela man i kain olsem strongpela soldia na bai em i ken daunim ol Rom na helpim ol Juda long winim ol narapela lain. Ol man i save olsem ol bikman bilong lotu Juda long Jerusalem i bin sakim Jisas na putim em long han bilong ol bikman bilong Rom na ol i kilim em i dai. Olsem wanem Pol inap kirapim ol long bilip tru olsem Jisas em i dispela Mesaia?
4 Senisim Pasin Bilong Autim Tok: Pol i save long tingting bilong ol man i harim tok bilong em, olsem na em i mekim wok long Baibel bilong toktok gut wantaim ol long ol samting ol i bilip long en. Olsem: Em i tok Jisas em i tumbuna pikinini bilong Devit na em dispela man Jon Bilong Baptais i bin toktok long en, em planti man i ting em i wanpela profet. (Ap. 13:23-25) Pol i tokaut olsem taim ol bikman bilong lotu i sakim Jisas na tok long em i mas i dai, ol i “inapim tok ol profet i bin mekim bipo.” (Ap. 13:26-28) Na tu, Pol i tok taim Jisas i kirap bek ol man i bin lukim em, na Pol i stori long sampela tok bilong Baibel em ol Juda i save long en na kirap bek bilong Jisas i bin truim.—Ap. 13:29-37.
5 Tasol taim em i autim tok long ol Grik long Areopagus long Atens, Pol i mekim wok long narapela pasin. (Ap. 17:22-31) Tasol em i mekim wankain tok long ol, na long dispela tupela taim em i autim tok, gutpela samting i bin kamap. (Ap. 13:42, 43; 17:34) Long nau tu, yumi inap toktok gut long ol man sapos yumi stori wantaim ol long ol samting yumi olgeta i wanbel long en na senisim pasin bilong yumi long autim tok na bai i stret long sindaun na tingting bilong ol.
[Askim Bilong Stadi]
1. Bai yumi skelim wanem stori bilong Baibel? Bilong wanem yumi bai skelim?
2. Yumi inap lainim wanem samting long pasin bilong Pol long kirapim tok?
3. Wanem samting i mekim na i hatwok long ol man i harim tok bilong Pol long bilip olsem Jisas em i Mesaia?
4. Olsem wanem Pol i toktok gut wantaim ol Juda i harim tok bilong em?
5. (a) Pol i senisim pasin bilong em olsem wanem taim em i autim tok long ol Grik? (b) Olsem wanem yumi ken bihainim pasin bilong Pol taim yumi autim tok?