Tokaut Long Biknem Bilong Jehova
1 Man bilong raitim song i tok: “Yupela olgeta manmeri bilong graun i mas singim song bilong Bikpela. Yupela i mas tokim olgeta lain manmeri long biknem bilong em na long ol gutpela gutpela wok em i bin mekim.” Taim yumi tingim tingim ol samting Jehova i bin mekim long bipo, na ol samting em i mekim long nau, na ol samting em bai mekim long bihain, bel bilong yumi i kirapim yumi long tokaut long biknem bilong em!—Sng. 96:1, 3.
2 Long Wok Autim Tok: Ol Witnes Bilong Jehova i karim nem bilong God na ol i litimapim dispela nem long olgeta hap bilong graun. (Mal. 1:11) Dispela i narapela kain tru long pasin em ol pris pasto bilong lain Kristendom i mekim. Ol i mekim pasin bikhet na rausim nem bilong God long ol Baibel ol i bin tanim ol tok bilong en! Em i bikpela samting long yumi mas tokim ol man long nem bilong God, long wanem, taim bilong bikpela hevi tru bai kamap na ol man i laik abrusim bagarap, ol i mas bilip na singaut long dispela nem. (Ro. 10:13-15, NW ) Na tu, taim nem bilong God i stap holi, dispela bai opim rot long olgeta samting long heven na graun i ken i stap wanbel. Tru tumas, nem bilong God i poroman wantaim olgeta samting em i mekim.
3 “Bikpela em i namba wan tru na yumi mas litimapim nem bilong em moa yet.” Ol man i mas save gut long Jehova bambai ol i ken “litimapim biknem” bilong em. (Sng. 96:4, 8) Tasol sampela man i tok olsem i no gat wanpela God i stap. (Sng. 14:1) Sampela i bagarapim gutnem bilong God na tok em i no gat strong, na em i no tingim ol samting i painim ol man. Tasol taim yumi helpim ol man i gat gutpela bel long kisim stretpela save long Man i bin wokim yumi, na ol samting em i tingting pinis long mekim, na ol gutpela pasin bilong em, yumi givim biknem long Jehova.
4 Long Pasin Bilong Yumi: Taim yumi bihainim ol stretpela lo bilong Jehova long i stap bilong yumi, dispela i givim biknem long em. Ol man i luksave taim yumi bihainim stretpela pasin. (1 Pi. 2:12) Olsem: Taim bilas bilong yumi i klin na i stret, dispela inap kirapim ol narapela long mekim gutpela tok long yumi, na nau dispela i opim rot long yumi inap tokim ol olsem taim man i bihainim ol stiatok i stap long Baibel, dispela bai helpim em tru. (1 Ti. 2:9, 10) Yumi save amamas tru taim ol narapela i ‘lukim ol gutpela pasin yumi mekim, na ol i litimapim nem bilong Papa bilong yumi i stap long heven’!—Mt. 5:16.
5 Long toktok na pasin bilong yumi, i gutpela yumi givim biknem long gutpela God bilong yumi long olgeta de, na long dispela rot yumi bihainim dispela tok olsem: “Singim song long Bikpela. Litimapim nem bilong en. Long olgeta de yupela i mas tokaut olsem, Bikpela i save kisim bek ol manmeri.”—Sng. 96:2.