Tingim Gut Man—Long Rot Bilong Mekim Gutpela Pasin
1 Maski Jehova em i King Bilong Heven na Graun, em i gat pasin helpim, tingim gut ol narapela, na mekim gutpela pasin long ol man i gat sin. (Stt. 19:18-21, 29) Yumi ken mekim gut moa wok bilong autim gutnius long rot bilong bihainim gutpela pasin bilong God bilong yumi. (Kl. 4:6) Yumi mas toktok long ol man long gutpela pasin rispek, tasol yumi mas mekim sampela samting moa.
2 Long Ol Haus: Olsem wanem sapos yumi bungim man bilong haus long wanpela taim we i no gutpela long toktok o em i no gat taim long toktok wantaim yumi? Em i gutpela long yumi luksave long ol dispela samting na yumi mekim sotpela tok tasol o tokim man olsem bai yumi kam bek long narapela taim. Yumi no ken strong strong long ol man i mas kisim buk o nius bilong yumi sapos ol i no laik kisim. Pasin bilong tingim ol narapela bai kirapim yumi long tingim haus na banis bilong ol, olsem yumi ken pasim geit o dua na skulim ol pikinini bilong yumi long mekim wankain pasin. Sapos yumi lusim sampela nius long haus, yumi mas putim long hap we ol narapela man i no ken lukim. Tru tumas, gutpela pasin bai kirapim yumi long mekim wankain pasin long ol narapela man olsem yumi laik bai ol i mekim long yumi.—Lu. 6:31.
3 Long Rot: Taim yumi autim tok long rot, yumi ken kamapim pasin bilong tingim ol narapela na yumi no ken pasim rot bilong ol man i wokabaut i go i kam, na yumi no bung bung long fran bilong ol stua. Yumi tingim ol man, yumi traim long toktok wantaim ol man i gat sampela minit long toktok na yumi no traim long toktok wantaim ol man i mas go hariap long sampela hap. Yumi no laik paitim tok i go i kam wantaim ol man husat i no laik kisim save long tok yumi autim, ating ol i laik tok pait tasol na pulim ol man i kam bung bung. Yumi mas lukautim gutnem bilong yumi olsem ol Witnes, yumi no ken pulim ai bilong ol man.—Mt. 12:19.
4 Autim Tok Long Telefon: Pasin bilong tingim ol narapela bai kirapim yumi long autim tok long telefon long ples we i no gat bikpela pairap long en. Yumi mekim gutpela pasin taim yumi tokaut hariap long yumi husat na stori long as na yumi ringim man. Pasin bilong toktok stret long telefon na toktok long gutpela pasin pren bai helpim yumi long kirapim man long toktok long Baibel. (1 Ko. 14:8, 9) Taim yumi mekim pasin helpim, tingim gut ol narapela, na mekim gutpela pasin long ol man, yumi bihainim pasin bilong gutpela God bilong yumi, Jehova.