Wok Autim Tok—Wanpela Wok i Kamapim Pasin Sori
1 Jisas i lukim ol bikpela lain manmeri, em ol i harim tok bilong em, ol “i stap nogut tru, olsem ol sipsip i no gat wasman.” (Mt. 9:36) Em i mekim gut bel bilong ol man, na long pasin isi na pasin laikim em i skulim ol man long Jehova, na em i laik helpim ol long go klostu moa long God. Taim yumi tingim tingim long bel ol pasin bilong Jisas, yumi kisim tingting bilong em, na pasin sori bai kamap klia long wok bilong yumi long autim tok.
2 Lusim liklik haptaim bilong tingim pasin Jisas i mekim taim ol man husat i laikim helpim, ol i kam long em. (Lu. 5:12, 13; 8:43-48) Em i tingim tru ol man i mas kisim helpim. (Mk. 7:31-35) Em i pilim tingting bilong ol narapela na em i soim olsem em i tingim ol. Em i no lukluk long ai tasol na skelim man, nogat. (Lu. 7:36-40) Tru tumas, Jisas i kamapim tru pasin sori bilong God bilong yumi.
3 “Sori Tru” Long Ol: Jisas i no mekim wok autim tok, long wanem, em wanpela wok em i mas mekim, nogat. Em i “sori tru” long ol man na em i mekim dispela wok. (Mk. 6:34) Olsem tasol long nau, yumi no save autim tok tasol, nogat, yumi laik helpim ol man long abrusim bagarap. Wok long kliagut long as na ol manmeri i save mekim ol pasin ol i save mekim. Bilong wanem ol i tingting planti na wari? Olsem wanem? Ol wasman bilong lotu giaman i bin giamanim ol man na ol i no bin lukautim gut ol? Taim yumi tingim tru ol narapela dispela bai kirapim ol long harim tok bilong gutnius.—2 Ko. 6:4, 6.
4 Pasin sori i save kirapim tru bel bilong ol man. Olsem: Wanpela meri i kisim bikpela bel hevi taim pikinini bilong em i gat 3-pela mun em i dai. Taim tupela Witnes i kam long haus bilong em, em i singautim tupela i go insait, long wanem, em i laik daunim tok bilong ol long i gat wanem as na God i larim pen na hevi i stap. Tasol bihain dispela meri i tok: “Ol i sori long mi na putim gut yau long tok bilong mi na bel bilong mi i stap isi, olsem na taim tupela i laik i go, mi orait long tupela i ken kam bek gen na lukim mi.” Olsem wanem? Yu save wok strong long kamapim pasin sori long ol man taim yu autim tok?
5 Sapos yumi kisim pasin bilong sori dispela bai helpim yumi long mekim gut bel bilong ol narapela. Taim yumi mekim olsem, yumi givim biknem long Jehova em “i as bilong olgeta pasin marimari na pasin sori.”—2 Ko. 1:3.