Tingim Gut Man—Long Rot Bilong Tok Amamas
1 Pasin bilong tok amamas long ol man i save kirapim ol long mekim samting, na i givim amamas long ol. Planti pablisa i luksave olsem taim ol i mekim liklik tok amamas long man taim ol i autim tok, dispela i save kirapim man long putim gut yau. Olsem wanem yumi ken tok amamas long ol man yumi autim tok long ol?
2 Luksave Long Ol Samting: Taim Krais Jisas i go pinis long heven, em i luksave long ol gutpela wok 7-pela kongrigesen long Esia Maina i mekim. (KTH 2:2, 3, 13, 19; 3:8) Olsem tasol, pasin bilong tingim ol man yumi bungim taim yumi autim tok bai kirapim yumi long painim rot bilong tok amamas long ol. Olsem: Taim yumi lukim olsem haus i gat ol gutpela gaden plaua samting, o wanpela papa o mama i soim olsem em i tingim tru pikinini bilong em, o sapos man bilong haus i smail na tok gude long yumi, olgeta dispela samting i opim rot bilong yumi long tok amamas long ol. Olsem wanem? Yu save luksave long ol kain samting olsem na tok amamas long ol man?
3 Putim Gut Yau: Taim yu autim tok long ol narapela, kamapim sampela gutpela askim long ol na long dispela rot yu inap kirapim ol long kamapim tingting bilong ol. Kamapim olsem yu tingim ol long rot bilong putim gut yau long tok ol i mekim. (Ro. 12:10) Long dispela rot, yu bai kisim save long wanpela samting em man bilong haus i kamapim na yu ken tok amamas long em, na long dispela rot yupela inap toktok long samting yupela i wanbel long en.
4 Bihainim Gutpela Tingting: Taim man bilong haus i mekim wanpela tok i no stret wantaim tok i tru bilong Baibel, orait yumi mas mekim wanem? Yumi no laik tokaut olsem tok bilong em i no stret, i gutpela yumi tok amamas long em i kamapim tingting bilong em na bihain yumi ken mekim kain tok olsem, “Mi lukim olsem yu tingim tru dispela samting.” (Kl. 4:6) Maski man i tok pait, ating yumi inap tok amamas long em i tingim tru dispela samting. Kain pasin isi inap mekim na maski man i no amamas long harim gutnius em bai senis liklik na isi long yumi.—Snd. 25:15.
5 Bilong tok amamas yumi mekim long man i ken strongim em, yumi mas pilim tru tok yumi mekim. Kain gutpela tok amamas olsem bai givim biknem long Jehova na dispela inap kirapim ol narapela long putim yau long tok bilong Kingdom.