Mekim Ol Wok Kristen, Kisim Planti Blesing
1 Taim yu kamap wanpela Kristen, ating pastaim yu bin wok strong long mekim gut ol wok Kristen, olsem stadi long Baibel, go long ol miting Kristen, autim tok, na beten. Jehova i bin blesim ol hatwok bilong yu, olsem na yu pas gut tru wantaim em. Ating yu baptais pinis inap sampela yia nau. Olsem wanem? Yu wok yet long mekim gut ol wok Kristen, wankain olsem yu bin mekim taim yu wok long kamap wanpela Kristen?
2 Skelim Pasin Yu Save Bihainim: Olsem wanem? Yu save ritim hap bilong Baibel long olgeta de? Yumi kisim planti gutpela samting taim yumi mekim olsem! (Jos. 1:8; Sng. 1:2, 3) Long Israel long bipo, olgeta wan wan king i mas ritim Lo “long olgeta de.” Dispela bai helpim ol olsem wanem? Ol king bai kisim pasin daun na lain long pret long Jehova na bai ol i no ken kalapim liklik ol lo bilong Em. (Lo 17:18-20) Na olsem tasol long nau, pasin bilong ritim Baibel long olgeta de bai helpim yumi long stap stret na i no gat asua namel long ol manmeri nogut bilong dispela graun. Dispela pasin i helpim yumi tu long mekim gut wok bilong God.—Fl. 2:15; 2 Ti. 3:17.
3 Jisas i save go oltaim long haus lotu we ol i save ritim buk bilong God. (Lu. 4:16) Dispela i strongim em long karim hevi bilong ol traim bai painim em. Yumi tu i kisim strong long ol tok yumi harim long ol miting bilong kongrigesen na long pasin bilong bung wantaim ol bratasista i “strongim bel bilong yumi olgeta wantaim.” (Ro. 1:12) Pasin bilong bung wantaim ol brata i helpim yumi long karim ol hevi bilong dispela taim bilong las de. (Hi. 10:24, 25) Olsem wanem? Yu save go yet long olgeta miting?
4 Baibel i tok ol aposel i insait long wok bilong autim gutnius ‘long olgeta de long tempel na long ol haus bilong ol manmeri.’ (Ap. 5:42) Ating yumi no inap autim tok long olgeta de, tasol yu ting yumi inap kisim pasin bilong insait long sampela rot bilong autim tok long olgeta wik? Taim yumi mekim olsem, bai yumi lain long mekim gutpela wok moa long Baibel, na bai yumi kisim ol gutpela ekspiriens long wok bilong autim tok i tru bilong Baibel long ol narapela man.
5 Profet Daniel i kisim planti blesing, long wanem, em i “bihainim na lotu oltaim” long Jehova i go inap long em i dai. Em i gat pasin bilong beten oltaim long Jehova. (Dan. 6:10, 16, 20) Na olsem tasol, taim yumi beten oltaim long Jehova, em bai givim holi spirit bilong em long yumi. (Lu. 11:9-13) Na tu, Jehova bai kam klostu long yumi, em bai larim yumi long pas gut wantaim em. (Sng. 25:14; Jem. 4:8) Dispela em i wanpela gutpela samting tru! Olsem na gutpela sapos yumi wok strong long mekim yet ol wok Kristen na kisim planti blesing long Jehova.
[Askim Bilong Stadi]
1. Bilong wanem em i gutpela long skelim pasin yumi save bihainim long mekim ol wok Kristen?
2. Pasin bilong ritim Baibel long olgeta de i helpim yumi olsem wanem?
3. Yumi kisim wanem ol gutpela samting taim yumi go oltaim long ol miting?
4. Pasin bilong autim tok long olgeta wik i helpim yumi olsem wanem?
5. Bilong wanem em i bikpela samting long beten oltaim long Jehova?