Yu Save Sambai Long Tok Bilong God?
1 Planti man bilong dispela graun i save daunim Baibel, tasol ol Kristen tru i save litimapim Tok Bilong God. Yumi bilip olsem “spirit bilong God yet i bin kamapim olgeta tok i stap long buk bilong God,” olsem na yumi wanbel wantaim Jisas Krais husat i beten na tokim Jehova olsem: “Tok bilong yu i tru olgeta.” (2 Ti. 3:16; Jo. 17:17) Olsem wanem yumi ken sambai gut long Tok Bilong God?
2 Putim Ol Skripsa Long Tingting: Jisas i givim bel long stadi long Tok Bilong God. Dispela i mekim na em inap skulim ol man long Baibel taim em i mekim wok bilong em long graun. (Lu. 4:16-21; 24:44-46) Olsem wanem yumi ken putim ol skripsa long tingting bilong yumi? Yumi ken mekim olsem long rot bilong ritim Baibel long olgeta de na tingim tingim long bel sampela ves i strongim bel bilong yumi o i helpim yumi long wok autim tok. Taim yumi redim ol hap bilong miting, yumi mas opim Baibel na ritim ol skripsa ol i no raitim tok bilong en na redim sampela tok bilong stori long en. Taim yumi go long ol miting, gutpela yumi opim Baibel na lukim ol tok brata i ritim. Taim yumi putim ol skripsa long tingting, dispela bai helpim yumi long “autim stret tok tru bilong God.”—2 Ti. 2:15.
3 Larim Baibel i Toktok: Taim yumi autim tok, yumi mas larim Baibel i toktok. Sapos inap, yumi mas traim long ritim na stori long wanpela skripsa long man bilong haus. Sapos em i kamapim wanpela askim o em i gat tok long wanpela samting, em i gutpela yumi yusim Baibel bilong bekim tok. Taim man bilong haus i bisi, ating yumi ken kamapim wanpela tok bilong Baibel na tok, “Paslain long mi go, mi laik ritim wanpela skripsa long yu.” Sapos inap, ritim stret long Baibel, na larim man bilong haus i lukluk long Baibel taim yu ritim skripsa.
4 Taim wanpela man bilong haus i lukim ol skripsa i soim olsem bilip bilong God Triwan i no tru, em i tok: “Long laip olgeta bilong mi, mi bin go long lotu, na mi no bin save Baibel i mekim dispela tok!” Em i amamas long stadi long Baibel. Jisas i tok ol sipsip bilong em bai harim maus bilong em. (Jo. 10:16, 27) Nambawan gutpela rot ol man i gat gutpela bel i ken luksave long tok i tru, em long rot bilong lukim stret long Baibel ol dispela tok. Olsem na yumi mas sambai long tok i tru bilong Baibel!