Mekim Wok Long Baibel Taim Yu Autim Tok
1 Ol tok bilong Baibel i gat bikpela strong na em inap kirapim ol man long bihainim gutpela pasin. Olsem na taim ol Kristen bilong pastaim i autim tok, ol i mekim gutpela wok long tok bilong Baibel. Aposel Pol i “toktok wantaim ol long ol tok i stap long buk bilong God,” na em i autim as bilong ol dispela tok na kolim sampela tok bilong Baibel bambai ol i ken save dispela tok i stret. (Ap 17:2, 3) Taim Apolos i autim tok long ol Juda, “em i autim tok bilong buk bilong God bilong soim ol klia tumas olsem, Jisas em i man God i makim bilong kisim bek ol manmeri bilong en.”—Ap 18:24-28.
2 Ol Witnes Bilong Jehova long nau ol i bihainim pasin bilong tupela. Olsem Wastaua bilong Novemba 1, 1986, pes 22 i tok: “Taim ol i autim tok, ol i laik bai ol man i ken save, dispela tok ol i autim em i no tok bilong ol, em i tok bilong God. Olsem na taim ol i autim tok ol i save kaunim tok bilong Baibel long ol man.” Olsem wanem? Taim yu autim tok yu save mekim bikpela wok long Baibel olsem?
BILONG WANEM BAIBEL INAP MEKIM GUTPELA WOK?
3 Bilong wanem Baibel inap mekim gutpela wok? Long wanem Baibel em i tok bilong God na i gat bikpela strong—“em i save gut tru long olgeta tingting na laik bilong bel bilong yumi.” (Hi 4:12) Taim yumi kaunim ol tok i tru bilong Baibel long ol man, tingting tru i stap long bel bilong ol i kamap ples klia. Ol man i gat gutpela bel ol i laikim tumas ol tok i tru bilong Baibel. Olsem tupela yangpela marit—taim ol i kisim tok i tru, ol i wok long kamap strong hariap, na kwiktaim ol i kirap mekim wok bilong Jehova. Taim ol brata i askim tupela, wanem samting i mekim na kwiktaim ol i givim bel long tok i tru, ol i tok, ‘long wanem, ol i kamapim tok bilong Baibel long mipela.’ Taim ol pablisa i kamapim tok bilong Baibel long tupela hia, ol i save dispela tok i olsem maus bilong “gutpela wasman bilong ol sipsip.”—Jo 10:14; wE 6/1/78 pes 22-23.
4 Olsem wanem? Sampela taim yu pilim olsem yu no inap mekim gutpela wok long Baibel taim yu autim tok? Sapos yu makim taim long olgeta wik bilong yu yet yu ken stadi long Baibel, na redim ol tok bai kamap long miting, na yu go long olgeta miting, orait, bai yu redi long mekim olgeta kain gutpela wok na yu no ken pret. (2 Ti 3:16, 17) Paslain long yu go autim tok, gutpela sapos yu redim Stori Bilong Dispela Mun wantaim poroman bilong yu long autim tok o wanpela long famili bilong yu. Na pes 9-15 bilong buk Reasoning i kolim sampela pasin bilong kirapim tok na i gat wanpela skripsa tu bilong kaunim insait long en. Gutpela sapos yu redim sampela tok em buk hia i kamapim. Toktok long ol samting em inap helpim tru ol manmeri long hap bilong yu na i save kirapim tingting bilong ol na bai ol i amamas long harim.
SKELIM GUT OL SAMTING
5 Sampela taim yumi ken kirapim man bilong haus long kisim Baibel bilong em yet na bai em i ken lukim ol tok bilong Baibel yumi kamapim. Tasol skelim gut ol samting—i gutpela yumi mekim olsem long em o nogat. (Lukim buk Reasoning, pes 67, paragraf 3, na pes 279, paragraf 2.) Sapos yumi pilim olsem yumi mas sotim tok, orait yumi ken kaunim wanpela skripsa tasol long Stori Bilong Dispela Mun. O sapos man bilong haus i gat wok, orait, yumi ken kolim nating liklik hap tok tasol bilong wanpela ves bilong Baibel i stret long tok yumi mekim, tasol yumi mas toksave long em olsem dispela tok i stap long Baibel. Jisas na ol aposel i no gat Olpela Testamen bilong ol yet wan wan bilong karim i go wantaim ol taim ol i autim tok, nogat. Tasol ol i save kolim planti planti tok bilong Baibel. Olsem na yumi tu yumi mas wok strong long holim long tingting sampela tok bilong Baibel, na taim yumi autim tok bai yumi inap tingim ol dispela tok na kolim nating long maus sapos yumi mas mekim olsem.
6 Pol i tokim Timoti long “autim stret tok tru bilong God.” (2 Ti 2:15) Yumi tu mas bihainim dispela tok. Taim yumi autim tok, gutpela yumi bihainim pasin bilong Jisas na ol aposel long kamapim planti taim ol tok bilong Baibel. Sapos rot i op, orait, kaunim ol tok long Baibel, tasol sapos yumi no gat rot long mekim, orait, kolim nating long maus. Sapos yumi mekim gutpela wok long Baibel, dispela bai kamapim long ples klia olsem yumi wokman bilong God na ol tok yumi autim i stret wantaim tok bilong Baibel.
[Ol Askim]
1. (a) Taim yumi autim tok, bilong wanem yumi mas mekim wok long Baibel? (b) Pol tupela Apolos i mekim wanem wok long Baibel?
2. Taim yumi autim tok, bilong wanem yumi mas mekim bikpela wok long Baibel?
3. Bilong wanem Baibel inap mekim gutpela wok?
4. Yu ken mekim wanem na bai yu mekim gut wok autim tok?
5. (a) Taim yumi autim tok, wanem taim yumi mas skelim gut ol samting? (b) Bilong wanem i gutpela sapos yumi holim long tingting sampela tok bilong Baibel?
6. Yumi ken mekim wanem na bai yumi bihainim gut tok bilong Pol long 2 Timoti 2:15?