Askim

● Bilong wanem i gutpela sapos ol pablisa i autim tok long teritori bilong kongrigesen ol i insait long en?

Em i bikpela samting yumi mekim stret ol samting olsem oganaisesen bilong Jehova i makim. Aposel Pol i tok: “God i save mekim stret olgeta wok bilong en. Em i no save mekim ol samting i paul nabaut. . . . Yupela i mas bihainim stret ol gutpela pasin bilong lotu.”​—⁠1 Ko 14⁠:​33, 40.

Gutpela yumi go long ol miting bilong kongrigesen i stap long hap yumi save sindaun long en, long wanem, teritori bilong dispela kongrigesen i stap klostu long yumi na yumi no hatwok long go autim tok​—⁠nogut yumi gat hatwok long go longwe bilong wok wantaim wanpela grup long teritori i no stap long hap yumi sindaun long en. Dispela bai helpim yumi, long wanem, yumi inap autim tok wantaim ol brata sista bilong kongrigesen bilong yumi yet, na yumi inap stiaim ol nupela man i go long ol miting long kongrigesen i stap klostu long ol. Na tu, yumi inap save gut long ol brata sista i stap long teritori bilong yumi na taim yumi gat hevi samting ol inap helpim yumi. Tasol sapos yu no gat rot bilong go long miting bilong dispela kongrigesen o yu gat wok bilong skin long taim bilong miting bilong dispela kongrigesen, orait yu ken tingim samting yu mas mekim. O sampela taim Sosaiti i laik bai wanpela brata, olsem elda samting, i go helpim narapela kongrigesen.

Sapos yumi abrusim pasin bilong bihainim tingting bilong yumi yet na yumi wok gut wantaim kongrigesen na bihainim ol tok bilong en, orait, yumi kamapim bel bilong yumi olsem, yumi tingim ol samting bilong Kingdom pastaim. (Lu 16⁠:10) Taim ol i kamapim wanpela nupela kongrigesen o ol i mekim sampela senis long ol Buk-Stadi bilong kongrigesen, ating yumi sampela i laik stap yet wantaim ol gutpela pren bilong yumi long olpela kongrigesen o Buk-Stadi bilong yumi. Tasol sapos yumi bihainim ol tok bilong kongrigesen na yumi go long wanem kongrigesen o Buk-Stadi ol i makim bilong yumi, bai yumi kisim ol nupela pren. Na sapos ol pablisa i save sindaun insait long teritori bilong kongrigesen ol i save go long en, orait, ol elda i no hatwok long was gut long ol dispela sipsip bilong kongrigesen na helpim ol pablisa long kamap strong moa long ol samting bilong spirit.