Autim Tok Wantaim Grup i Kamapim Amamas
1 Taim Jisas i salim 70 disaipel long mekim wok autim tok, em i lainim ol long tok ol i mas mekim, na makim tupela tupela long wok wantaim, na makim teritori ol i mas autim tok long en. Dispela i mekim na ol i kisim amamas. (Lu. 10:1-17) Long nau tu, pasin bilong autim tok wantaim grup i helpim lain bilong God long redi na stretim gut ol samting bilong wok autim tok na i strongim bel bilong ol. Long dispela kantri, pasin raskol na sampela narapela samting tu i mekim na bikpela hap bilong wok autim tok yumi mekim wantaim grup.
2 Ol Elda i Go Pas: Ol elda i mekim bikpela wok bilong helpim olgeta long autim tok oltaim. Wasman autim tok i go pas long stretim wok autim tok namel long wik. Olgeta wasman bilong Buk-Stadi i gat wok long stretim wok bilong grup bilong em, dispela i bikpela samting moa long wiken. Taim i gat bung bilong autim tok bilong kongrigesen olgeta, ating bai i gat bikpela grup tru bilong mekim wok autim tok. Long kain taim olsem, olgeta wan wan wasman bilong Buk-Stadi i mas stretim ol wok samting bilong grup bilong em yet.
3 “Bihainim Stret Ol Gutpela Pasin”: Brata ol i makim bilong lukautim bung bilong autim tok i mas kirapim bung long taim stret na longpela bilong bung em 10 o 15 minit. Paslain long em i beten bilong pinisim bung, i gutpela long em i stretim wok bilong grup na makim teritori (o wasman bilong Buk-Stadi bai mekim dispela, olsem yumi stori pinis). Dispela i mekim na ol pablisa i no gat wok long bung long teritori, em dispela inap daunim gutnem bilong wok bilong yumi. Dispela pasin i stret tu wantaim tok bilong Pol: “Yupela i mas bihainim stret ol gutpela pasin bilong lotu.” (1 Ko. 14:40) Olgeta husat i go long ol dispela bung, ol i mas mekim ol samting na bai bung i kamap gutpela. Ol i mas kam long taim stret, wok gut wantaim brata i go pas, na taim bung i pinis ol i mas kirap kwik long go long teritori.
4 Pas Gut Wantaim Long Pasin Wanbel: Pasin bilong autim tok wantaim grup i gutpela rot bilong yumi ken kisim save long ol narapela insait long kongrigesen. I no gat tambu long pasim tok pastaim bilong wok wantaim wanpela, tasol sapos yumi no bin mekim olsem, yumi inap kisim ol gutpela samting taim yumi go long bung bilong wok autim tok. Brata inap makim yumi long wok wantaim wanpela yumi no save gut long em, na long dispela rot yumi inap “givim bel” long ol narapela tu.—2 Ko. 6:11-13.
5 Pasin bilong wok wantaim grup i strongim bel bilong yumi na i mekim yumi pas gut wantaim olsem ‘ol wanwok long tok tru bilong God.’ (3 Jo. 8) Gutpela sapos yumi givim bel long autim tok wantaim grup!