Pilim Pasin Marimari Bilong God

¹ Taim aposel Pol i no kamap Kristen yet, em i birua tru long lotu Kristen i go long planti hap. Tasol em i mekim dispela pasin taim em i no gat stretpela save, olsem na God i marimari long em. Jehova i mekim gutpela pasin na em i givim wok bilong autim tok long Pol. Pol i ting dispela wok i gutpela samting tru. (Ap. 26:​9-18; 1 Ti. 1:​12-14) Pol i pilim tru pasin marimari bilong Jehova na dispela i kirapim em long givim bel long inapim wok bilong em.​—⁠2 Ko. 12:⁠15.

² God i marimari long yumi, na em i bin givim wok long yumi tu. (2 Ko. 4:⁠1) Olsem Pol, yumi inap givim bel long helpim ol narapela long kamap strong long ol samting bilong spirit, na long dispela rot yumi soim olsem yumi pilim tru pasin bilong God long marimari long yumi. Wanpela rot bilong mekim olsem, em yumi ken kirapim na mekim ol Baibel-stadi.

³ Kirapim Ol Baibel-Stadi: Wanpela samting yumi ken mekim bilong kirapim ol Baibel-stadi em yumi ken kamapim magasin-raun. Taim yumi go oltaim long lukim ol man long magasin-raun bilong yumi, yumi kisim gutpela save moa long ol samting ol i tingting planti long en. Bihain, wanpela stori long nius inap opim rot long yumi ken soim pasin bilong stadi long buklet Yumi Mas Mekim Wanem? Taim yumi go bek lukim ol man bilong tilim ol nius long ol, ating yumi inap stori moa wantaim ol long buklet Yumi Mas Mekim Wanem?

⁴ Yumi Mas Beten na Wok Strong: Pasin bilong beten na givim bel long wok bai mekim na wok autim tok bilong yumi i kamap gutpela moa. Wanpela painia sista husat i gat wanpela Baibel-stadi, em i beten askim Jehova long helpim em long kisim sampela stadi moa. Sista hia i mekim ol samting i stret wantaim ol beten bilong em. Em i skelim wok autim tok bilong em yet na em i luksave olsem taim em i mekim ol gobek, em i no save tokim ol man long stadi long Baibel. Em i kirap long tokim ol man long stadi na i no longtaim na em i gat tupela stadi moa.

⁵ Yumi gat gutpela wok long insait long wok bilong “autim tok long gutnius bilong marimari bilong God”! (Ap. 20:24) Gutpela sapos pasin bilong pilim pasin marimari bilong God i kirapim yumi long givim bel long helpim ol narapela long kisim ol gutpela samting pasin marimari bilong Jehova i save kamapim.