Bihainim Pasin Bilong Jisas

¹ Taim yumi mekim wok bilong kamapim ol disaipel, yumi mas tingim olsem pasin bilong yumi i gat strong inap long mekim sampela samting long ol man i lukluk long yumi. Jisas i skulim ol man long rot bilong toktok bilong em na pasin em i mekim. Ol man i lukluk long em ol inap lukim pasin bilong em long givim bel long mekim wok, laikim ol man, holim wanpela tingting tasol long mekim holi nem bilong Papa bilong em, na tingting strong long kamapim laik bilong Papa bilong em.​—⁠1 Pi. 2:⁠21.

² Taim Yumi Autim Tok Long Ol Haus: Olsem Jisas, pasin bilong yumi inap mekim sampela samting long ol man i wok wantaim yumi long autim tok. Taim ol nupela pablisa na ol pablisa husat i no save gut long autim tok ol i lukim pasin bilong yumi long givim bel long autim tok, ol bai tingting long mekim wok autim tok bilong ol i kamap gutpela. Taim ol i lukim yumi amamas na yumi laik tru long helpim ol narapela, dispela bai kirapim ol long tingim olsem em i bikpela samting long kamapim ol dispela pasin taim ol i autim tok. Taim ol i lukim pasin bilong yumi long mekim gut wok long Baibel, mekim ol gobek na ol Baibel stadi, dispela bai kirapim ol long mekim wankain pasin.

³ Taim Yumi Mekim Ol Baibel Stadi: Ol Baibel sumatin bilong yumi bai lukluk long ol pasin bilong yumi. Olsem: Ating yumi stori gut long as na em i bikpela samting long ol i mas redim gut stadi, skelim ol skripsa, na makim ol bikpela tok, tasol ol bai luksave olsem yumi yet i bin redim stadi o nogat. (Ro. 2:21) Sapos yumi save kamap long taim stret bilong stadi wantaim ol, ol bai i no larim ol narapela wok i pasim ol long mekim Baibel stadi bilong ol. Na tu, ol bai lukim strongpela bilip bilong yumi na pasin bilong yumi long daunim sampela laik bilong yumi yet bilong mekim dispela wok. Yumi no kirap nogut olsem planti taim ol sumatin bilong ol man husat i bihainim gut pasin bilong Jisas, ol dispela sumatin i save wok strong long autim gutnius, na ol i save mekim gutpela wok.

⁴ Taim Yumi Go Long Ol Miting: Olgeta man insait long kongrigesen Kristen ol i gat wok long skulim ol narapela, long rot bilong pasin ol i mekim long ol miting bilong kongrigesen. Taim ol man i laik harim tok bilong God ol i kirap long kam long ol miting, ol i save lukim ol gutpela pasin insait long kongrigesen na dispela i save helpim ol. Bai ol i lukim gutpela pasin namel long lain brata, pasin wanbel bilong ol Kristen, na gutpela pasin bilong putim klos na bilas. (Sng. 133:⁠1) Bai ol i luksave tu long pasin bilong yumi long go oltaim long ol miting na kamapim bilip bilong yumi long ol miting. Wanpela man husat i bin kam long miting em i lukim olsem wanpela liklik meri i painim kwik wanpela skripsa long Baibel bilong em yet na bihainim gut taim ol i ritim. Gutpela pasin bilong liklik meri i mekim na em i askim long wanpela i ken mekim Baibel stadi wantaim em.

⁵ Baibel i kirapim yumi long bihainim gutpela pasin bilong narapela narapela. (Fl. 3:17; Hi. 13:⁠7) Olsem na yumi mas tingim, sapos yumi bihainim gut pasin bilong Jisas, ol narapela bai lukim na dispela inap mekim gutpela samting long ol. Yumi save long dispela, olsem na yumi mas tingim na bihainim tok bilong 1 Timoti 4:​16, olsem: “Yu mas was gut long ol pasin bilong yu yet na long wok yu mekim bilong skulim ol manmeri.”

[Askim Bilong Stadi]

1. Jisas i stap gutpela piksa long wanem samting?

2. Pasin bilong yumi inap mekim wanem long ol man i wok wantaim yumi long autim tok?

3. Olsem wanem pasin bilong yumi inap skulim ol Baibel sumatin? Ol inap lain long wanem samting?

4. Taim yumi go long ol miting bilong kongrigesen, pasin bilong yumi inap skulim man long wanem samting?

5. Bilong wanem yumi no ken ting pasin yumi mekim, em i liklik samting?