Putim Mak Long Mekim Wanpela Baibel Stadi
1 “Yupela i mas lukluk nabaut na lukim gut ol gaden. Ol kaikai i redi pinis.” (Jo. 4:35) Dispela tok bilong Jisas i stret tru long wok bilong ol Kristen long nau.
2 Ol man i gat gutpela bel em ol i laik kisim skul long ol pasin bilong Jehova ol i stap yet. Dispela i kamap klia long namba bilong ol nupela disaipel i kisim baptais long olgeta yia. Sapos yu gat laik tru long mekim wanpela Baibel stadi, orait yu mas mekim wanem?
3 Putim Mak: Namba wan samting, putim mak long kirapim na mekim wanpela Baibel stadi. Tingting long dispela mak taim yu mekim wok autim tok. Wok bilong yumi ol Kristen i bilong autim tok na skulim ol man, olsem na yumi olgeta i mas wok strong long insait moa long wok bilong mekim ol Baibel stadi.—Mt. 24:14; 28:19, 20.
4 Ol Narapela Samting Bilong Tingim: Ol pablisa i mas beten strong. Sampela taim yumi bungim ol man husat i bin beten long kisim helpim bilong kliagut long Baibel. Em i wanpela blesing tru long Jehova i yusim yumi bilong painim ol kain man olsem na skulim ol!—Ap. 10:1, 2.
5 Wanpela sista i beten askim God long helpim em long painim wanpela Baibel stadi, na em i putim ol liklik nius Yu Laik Kisim Sampela Save Moa Long Baibel? long tebol long ples wok bilong em. Wanpela meri i kisim wanpela nius, em i ritim dispela nius olgeta, na kirap long raitim nem na atres long hap i stap long baksait bilong nius, orait dispela sista i kirap toktok wantaim em na em inap kirapim stadi wantaim em.
6 Ol narapela pablisa husat i gat save long kirapim na mekim ol Baibel stadi, ol i ken helpim yu long winim mak bilong yu long mekim wanpela Baibel stadi. Beten na tokim God long wok yu mekim bilong painim wanpela Baibel stadi, na mekim wok long ol samting inap helpim yu long winim dispela mak. Ating i no longtaim na bai yu amamas long mekim wanpela Baibel stadi.