Bilong Wanem Yu Mas Laik Long Mekim Wanpela Baibel-Stadi?
1 Taim Kristen i helpim wanpela man long kamap disaipel bilong Krais, dispela em wanpela gutpela samting tru i bin painim dispela Kristen. (Mt 28:19, 20; 1 Ko 3:6-9) Na tu, ol man yumi helpim ol long kamap disaipel bilong Krais, ol inap kisim laip oltaim.
2 Taim brata o sista i mekim Baibel-stadi, em wantaim Baibel-stadi i save kamap gutpela pren tru. Taim em i lukim Baibel-stadi i wok long kamap strong, dispela i givim bikpela amamas tru long em. (1 Te 2:11, 19, 20) Olsem na gutpela sapos olgeta wan wan Kristen i wok strong long kisim wanpela Baibel-stadi i no wanhaus bilong em; dispela i ken i stap olsem wanpela mak ol i laik winim. Tru em wok bilong papa long stadi wantaim famili bilong em, tasol sapos papa i no Kristen, orait mama Kristen i mas stretim rot bambai em i ken mekim Baibel-stadi wantaim ol pikinini bilong em.
BETEN LONG KISIM BAIBEL-STADI
3 Las de i klostu pinis, olsem na yumi mas taitim bun na wok strong long mekim gut ol Baibel-stadi. Sapos olgeta taim yumi beten long kisim wanpela Baibel-stadi, Jehova bai save yumi gat bikpela laik tru long kisim. Na kain beten olsem i kamapim klia olsem yumi save, man i mas stadi na kisim save long tok bilong Baibel bambai em inap kisim laip i stap oltaim. (Ese 33:7-9, 14-16) Yumi ken bilip tru olsem Jehova bai blesim ol dispela wok yumi givim bel tru long mekim.—1 Jo 5:14, 15.
4 Insait long 4-pela yia i go pinis, long olgeta hap bilong graun, 1,088,181 manmeri i bin kisim baptais. Planti bilong dispela lain i bin mekim olsem, long wanem ol brata sista i bin mekim Baibel-stadi wantaim ol. Bikpela lain manmeri i bin kam long Memorial na ol kibung distrik na dispela i makim olsem i gat planti manmeri yumi mas helpim ol long kamap strong bambai ol tu i ken baptais. Sapos yumi wok yet long kirapim na mekim ol Baibel-stadi wantaim ol, ating bai yumi inap helpim planti moa long kamap disaipel, na bihain ol inap long kisim laip i stap oltaim.—1 Ti 6:12, 19.
[Ol Askim]
1. (a) Taim yu mekim Baibel-stadi yu inap kisim wanem gutpela samting long en? (b) Kolim wanpela tok long Baibel i mas kirapim yu na yu laik mekim Baibel-stadi wantaim man? (c) Long 1 Korin 3:6-9, Baibel i mekim wanem tok promis long ol man i mekim Baibel-stadi?
2. (a) Olgeta wan wan Kristen i mas putim wanem samting i olsem mak ol i laik winim? (b) Kaunim 1 Tesalonaika 2:11, 19, 20. Pol i “amamas” long wanem samting? Yumi tu mas “amamas” long wanem samting?
3. (a) Kaunim 1 Jon 5:14, 15. Sapos yumi laik tru long kisim wanpela Baibel-stadi, yumi ken bilip tru long wanem samting? (b) Kaunim Esekiel 33:7-9, 14-16. Jehova i givim wanem toksave long lain bilong em? Na em i givim wanem tok long ol bilong strongim bel bilong ol?
4. (a) Wanem gutpela samting i bin kamap taim yumi mekim ol Baibel-stadi? (b) Olsem 1 Timoti 6:12, 19 i tok, yumi laik bai ol Baibel-stadi bilong yumi i mekim wanem? Bilong wanem yumi laik bai ol i mekim olsem?