Kirapim Man Long Harim Tok Long Taim Yu Autim Tok Long Em Long Namba Wan Taim
1 Taim yumi autim tok, yumi save bungim ol man i tingting planti long ol samting bilong ol yet, o ol i gat strongpela tingting long ol samting bilong lotu, olsem na sampela taim i hatwok long kirapim toktok wantaim ol. Yumi ken mekim wanem ol tok bilong kirapim man long harim tok taim yumi autim tok long em long namba wan taim?
2 Taim yumi tilim “Wastaua” bilong Epril 1, 1992 i tok long “Stap Fri Tru—Long Wanem Rot?” orait yumi ken tok:
◼ “Long nau planti man long olgeta hap i wok strong long kamap fri. Ol gavman bilong graun i tok promis long helpim ol, tasol ol i no bin mekim. Sapos yumi laik i stap fri tru oltaim oltaim, yumi mas lotuim Jehova, em i God tru.” Kaunim 2 Korin 3:17 na tokim man, dispela Wastaua i stori long tok promis God i bin mekim, na olsem wanem ol samting i kamap long graun long nau i kamapim klia olsem klostu nau bai yumi inap i stap fri tru.
3 “Wastaua” bilong Epril 15, 1992, i stori long beten na yu ken kirapim tok olsem:
◼ “Long taim bilong pait ol man i save beten askim God long helpim ol long win. Olsem wanem? Yu ting God i save harim kain beten olsem na helpim sampela lain na sampela lain nogat? [Larim man i bekim tok.] Baibel i bekim dispela askim.” Kaunim 1 Pita 3:12 na stori liklik long insait bilong en. Orait nau kamapim sampela tok bilong Wastaua em inap kirapim tingting bilong man, na bai em i gat laik long kaunim Wastaua. Sapos yu pilim olsem em i gat laik tru long harim tok, orait yu ken tokim em long kisim sabskripsen.
4 No ken lusim tingting olsem yumi laik kirapim Baibel-stadi. Ol painia inap painim planti man i laik stadi. Tasol yumi olgeta i ken wok strong long kirapim ol Baibel-stadi.
5 Sampela pablisa i save mekim wok long ol liklik nius bilong kirapim Baibel-stadi taim ol i autim tok long man long namba wan taim.
Taim yu tilim liklik nius “Gutpela Sindaun Long Nupela Taim,” orait yu ken tok:
◼ “Mipela i mekim wanpela wok long dispela hap em bilong helpim yu. Mi laik givim dispela liklik nius long yu bambai yu ken save long dispela wok mipela i mekim. Yu ting olsem wanem long dispela piksa? Yu ting kain gutpela taim olsem inap kamap long dispela graun?” Larim man i bekim tok. Orait, nau yu ken stori long paragraf 1-5 na kamapim tok bilong Matyu 6:9 na Buk Song 37:29. (Wanpela pablisa i ken mekim liklik soim long pasin bilong mekim wok long dispela liklik nius bilong kirapim Baibel-stadi.)
6 Tingim gut ol tok yu ken kamapim bilong kirapim tok. Sampela gutpela pasin bilong kirapim tok i stap long buk Reasoning, long pes 9-15. Sapos yu mekim gutpela wok long ol dispela kain pasin bilong kirapim tok, orait dispela bai helpim yu long kirapim man long harim tok taim yu autim tok long em long namba wan taim.